Украинанинг Львов шаҳрида жойлашган масжидга ўт қўйишга уриниш ҳолати қайд этилди. Бу ҳақда “РБК-Украина” хабар берди. Нашр маълумотларига кўра, номаълум шахс масжид биносига ёнилғи аралашмаси солинган иккита шишани ирғитиб, воқеа жойидан қочиб кетган.

Львов вилояти полицияси маълумотига кўра, ҳодиса 28 апрель куни соат 20:40 да содир бўлган. Шу вақтда 102 хизматига масжидда ёнғин чиққанлиги ҳақида хабар келиб тушган.

Дастлабки маълумотларга кўра, ташланган шишалардан биридаги суюқлик ёниб кетган. Бироқ масжид ходимларидан бири ёнғинни ўт ўчирувчилар етиб келгунга қадар мустақил равишда бартараф этган. Қайд этилишича, ҳодиса оқибатида ҳеч ким жабрланмаган.

Айни пайтда терговчилар биринчи навбатдаги процессуал ҳаракатларни олиб бормоқда, гувоҳлар ва воқеа шоҳидлари сўроқ қилинмоқда. Ҳужум қилган шахснинг шахси аниқланмоқда.

Ҳуқуқни муҳофаза қилувчи идоралар Украина Жиноят кодексининг 194-моддаси 2-қисми бўйича жиноят иши қўзғатган. Судгача бўлган тергов ҳаракатлари давом этмоқда.