Бишкекда «Туркий дунё маданий мероси соҳасида стратегик йўналишларни белгилаш ва ҳаракатлар режаларини тасдиқлаш» ҳақида Туркий маданият ва мероси жамғармаси Кенгашининг 3-йиғилиши бўлиб ўтди.

Унда, Туркий маданият ва мерос жамғармаси Президенти Актоти Раимкулова, Туркий Давлатлар Ташкилоти Бош котиби Кубаничбек Омуралиев, шунингдек, Ўзбекистон Республикаси маданият вазири Озодбек Назарбеков, Қирғиз Республикаси маданият, ахборот ва ёшлар сиёсати вазири Мирбек Мамбеталиев, Қозоғистон Республикаси маданият ва ахборот вазири ўринбосари Ойбек Сидиқов, Озарбайжон Республикаси маданият вазири ўринбосари Саодат Юсифова ва Туркия Республикасининг Қирғиз Республикасидаги элчиси Мекин Мустафа ҳамда расмий вакиллар иштирок этди.

Йиғилишда делегация аъзолари «Туркий дунё нигоҳи – 2040» ҳужжатини, TURKTIME ташаббуси ва Туркий дунё Хартияси доирасида, туркий маданий меросини сақлаш, ривожлантириш ва келажак авлодларга етказиш бўйича лойиҳаларни муҳокама қилишди.

Шунингдек, учрашув давомида Жамғарманинг 2025 йилги фаолияти кўриб чиқилиб, амалга оширилаётган лойиҳалар ва ташаббусларнинг амалга оширилишини баҳолашди ва 2026–2027 йиллар учун устувор иш йўналишлари белгилаб олинди.

Шу билан бирга, маданий меросни сақлаш ва рақамлаштириш, илмий тадқиқотлар соҳасидаги ҳамкорликни кенгайтириш, қўшма халқаро дастурларни амалга ошириш ва туркий макон доирасида гуманитар мулоқотни мустаҳкамлашга алоҳида эътибор қаратилди.

Кенгашнинг 3-йиғилиши якунида жамғармага аъзо давлатлар ўртасида баённома имзоланди.

Жамғарманинг 3-Кенгаш йиғилишининг Қирғиз Республикасида ўтказилиши Туркий маданияти ва мероси жамғармаси томонидан ташкил этилган йиллик йиғилишлар амалиётини давом эттирди, бу амалиёт илгари Озарбайжон Республикасида (2024 йилда) ва Қозоғистон Республикасида (2025 йилда) ўтказилган бўлиб, Турк дунёси мамлакатлари ўртасида маданий ҳамкорликни мустаҳкамлаш ва барқарор ўзаро таъсирни ривожлантириш бўйича унинг миссиясини изчил амалга ошираётганини намойиш этади.

Маълумот ўрнида, Туркий маданияти ва мероси жамғармаси туркий давлатлар раҳбарларининг ташаббуси ва кўмагида туркий халқларнинг моддий ва номоддий маданий меросини сақлаш, ўрганиш ва тарғиб қилиш, шунингдек, туркий давлатлар ўртасида илмий, нашриёт ва гуманитар ҳамкорликни ривожлантириш мақсадида ташкил этилган халқаро ташкилотдир.