Электр энергиясидан ноқонуний фойдаланиш ҳолатлари фош этилди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Сирдарё тумани бўлими томонидан терговга қадар текширув ўтказилган.

Унда «М.К» фермер хўжалиги масъул шахслари «Шоликор» SIU ҳудудидаги сув насосларини электр тармоғига тижорат мақсадида ўзбошимчалик билан тўғридан-тўғри улаб, 551,5 млн сўмлик электр энергиясидан ноқонуний фойдаланганликлари аниқланган.

Шу каби яна бир ҳолат, Департаментнинг Жарқўрғон тумани бўлими томонидан ўтказилган терговга қадар текширувда ҳам аниқланган.

Унга кўра, Жарқўрғон тумани кўп тармоқли поликлиникаси масъул шахслари поликлиника биносида электр ҳисоблагичга ташқи таъсир ўтказиб, 298,9 млн сўмлик электр энергиясидан ноқонуний фойдаланганликлари маълум бўлган.

Шунингдек, Департаментнинг Самарқанд шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган терговга қадар текширувда «М.Ў.» МЧЖ масъул шахслари тунги ёритгич чироқларини электр тармоғига тижорат мақсадида ўзбошимчалик билан улаб, 148,9 млн сўмлик электр энергиясидан ноқонуний фойдаланганликлари аниқланган.

Департаментнинг Шайхонтоҳур тумани бўлими томонидан ўтказилган терговга қадар текширувда «К.К.» МЧЖ раҳбари Ш.Д. кўп қаватли уйнинг лифтини электр тармоғига ўзбошимчалик билан тўғридан-тўғри улаб, 146,9 млн сўмлик электр энергиясидан ноқонуний фойдаланиб келгани ошкор бўлган.

Департаментнинг Уйчи тумани бўлими томонидан ўтказилган терговга қадар текширувда фуқаро К.К. «Тепасарой» МФЙ ҳудудидаги хонадонида умумий фойдаланишдаги электр тармоғига ўзбошимчалик билан тўғридан-тўғри уланиб, 122,4 млн сўмлик электр энергиясидан ноқонуний фойдаланганлиги аниқланган.

Бундан ташқари, Департаментнинг Самарқанд шаҳри бўлими томонидан терговга қадар текширув ўтказилган. Аниқланишича, «Булунғур туман йўллардан фойдаланиш» УК масъул шахслари «Ибн Сино» кўчасидаги бинода умумий фойдаланишдаги электр тармоғига ўзбошимчалик билан уланиб, 111,5 млн сўмлик электр энергиясидан ноқонуний фойдаланиб келган.

Департаментнинг Учқўрғон тумани бўлими томонидан ўтказилган терговга қадар текширувда «С.О.» фермер хўжалиги раҳбари Ф.Ш. «Нуробод» МФЙ ҳудудидаги сув насосини умумий фойдаланишдаги электр тармоғига тижорат мақсадида ўзбошимчалик билан уланиб, 109,4 млн сўмлик электр энергиясидан ноқонуний фойдаланганлиги фош қилинган.

Шу каби яна бир ҳолат, Департаментнинг Сўх тумани бўлими томонидан ўтказилган терговга қадар текширувда ҳам фош этилган.

Унда «Д.С» фермер хўжалиги масъул шахслари «Хўжақишлоқ» МФЙ ҳудудида сув насосларини тижорат мақсадида электр тармоғига ўзбошимчалик билан улаб, 82,9 млн сўмлик электр энергиясидан ноқонуний фойдаланганликлари аниқланган.

Ҳозирда мазкур ҳолатлар юзасидан Жиноят кодексининг 169-моддаси (ўғрилик) ва 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.