Ўзбекистон ва Қозоғистон халқ артисти Фаррух Зокировнинг қутлуғ 80 йиллик юбилейи мамлакатимизда кенг миқёсда нишонланди. Машҳур санъаткор «Буюк хизматлари учун» ордени билан тақдирланди. Шунингдек, унинг бой ижодий меросини янада чуқур ўрганиш ва тарғиб этишга қаратилган давлатимиз раҳбарининг қарори қабул қилинди.

Бу эътибор санъаткорнинг миллий маданиятни ривожлантириш ва минтақада маънавий алоқаларни мустаҳкамлашга қўшган салмоқли ҳиссасининг юксак эътирофи бўлди.

Ушбу воқеа халқаро миқёсда ҳам ўз аксини топди: Фаррух Зокиров Қозоғистон Республикасининг давлат мукофоти — II даражали «Достық» ордени билан тақдирланди.

Шу муносабат билан Тошкентдаги Қозоғистон элчихонасида тантанали маросим бўлиб ўтди. Унда Қозоғистон Республикасининг Ўзбекистондаги Фавқулодда ва Мухтор Элчиси Бейбут Атамкулов Қозоғистон Республикаси Президенти Қасим-Жомарт Тоқаев номидан «Ялла» афсонавий ансамбли бадиий раҳбарига юксак мукофотни топширди.

«Достық» ордени санъатга бағишланган кўп йиллик меҳнат ҳамда Марказий Осиё халқлари ўртасида маданий ҳамкорликни мустаҳкамлашга қўшилган салмоқли ҳиссанинг ёрқин далили бўлди.

Юбилей муносабати билан йўлланган табрик мактубида Қозоғистон давлат раҳбари санъаткор ижодининг бирлаштирувчи қудратини алоҳида таъкидлади:

«Табиий истеъдодингиз, сўнмас ҳаётий ғайратингиз ва ноёб меҳнатсеварлигингиз туфайли Сиз бутун дунё бўйлаб миллионлаб мухлисларнинг самимий муҳаббатига сазовор бўлдингиз. Сизнинг санъатингиз кўп йиллар давомида турли авлод ва халқларни бирлаштириб келмоқда. Қозоғистонда Сизни бетакрор овозингиз ва “Ялла” ансамбли ижросидаги машҳур қўшиқларингиз учун юксак қадрлашади».

Фаррух Зокиров номи мусиқа маданияти тарихида алоҳида ўрин эгаллаб, турли авлод ва халқларни боғловчи рамзга айланган.

Жавоб сўзида юбиляр Қозоғистон Президентига юксак эътибор учун самимий миннатдорлик билдирди. Унинг таъкидлашича, мазкур мукофот нафақат катта шараф, балки Ўзбекистон ва Қозоғистон ўртасидаги мустаҳкам маданий алоқаларнинг яна бир тасдиғидир.

Нурлан УСМОНОВ, «Халқ сўзи».