АҚШ Президенти Дональд Трамп Исроил Бош вазири Биньямин Нетаньяҳу билан телефон орқали суҳбат чоғида унинг Яқин Шарқдаги ҳаракатларини ҳақоратли сўзлар билан кескин танқид қилди, деб хабар бермоқда Axios.

Портал суҳбатдошларининг таъкидлашича, Трамп Нетаньяҳуни «телба» деб атаган ва бош вазирга илгари кўрсатган ёрдамларини эслатиб ўтган.

«Агар мен бўлмаганимда, сен қамоқда ўтирган бўлардинг. Ҳозир эса ҳамма сени ёмон кўради. Бунинг касофатига ҳамма Исроилни ёмон кўриб қолди», — деган Америка етакчиси телефон мулоқотида.

АҚШ Президенти яҳудий давлати бош вазирига коррупция иши бўйича қамоқ жазосидан қочишига бевосита ёрдам берганини очиқ айтган ва Ливанга берилаётган зарбалар оқибатида Исроил халқаро майдонда янада каттароқ яккаланиб қолишини башорат қилган.

Трампни шиаларнинг «Ҳизбуллоҳ» ҳаракатининг бир нечта қўмондонларини йўқ қилиш мақсадида кўплаб тинч аҳоли вакиллари ҳалок бўлаётгани, шунингдек, бутун-бутун биноларнинг вайрон этилаётгани қаттиқ хавотирга солган.

Бундан олдин Дональд Трамп Биньямин Нетаньяҳу ва «Ҳизбуллоҳ» раҳбарияти билан Ливанда ўт очишни тўхтатиш бўйича келишиб олганини маълум қилган эди. Исроил бош вазири билан телефон орқали ўтказилган суҳбат якунларига кўра, Америка етакчиси Исроил қўшинлари Байрутга юборилмаслигини қайд этганди.

Бунгача Tasnim агентлиги Исроилнинг Ливандаги эскалациясига норозилик белгиси сифатида Теҳрон Вашингтон билан хабар алмашишни тўхтатгани ҳақида хабар берган эди.