АҚШ ҳукумати мигрантларнинг айрим тоифаларини текшириш бўйича янги чора-тадбирларни жорий этди, деб хабар беради «Коммерсантъ».

Қайд этилишича, кучайтирилган текширувлар иммиграция имтиёзлари: бошпана, грин-карта ва АҚШ фуқаролигини олиш учун ариза топшираётган шахсларга нисбатан қўлланилади.

АҚШ Фуқаролик ва иммиграция хизмати ходимларига кенгайтирилган биография текширувидан (background check) ўтмаган, ҳозирда кўриб чиқилаётган исталган ишни тасдиқлашдан тийилиш топширилди.

Хавфсизлик текширувларини кучайтириш ФҚБнинг АҚШ президенти Дональд Трампнинг февраль ойидаги фармони доирасида Фуқаролик ва иммиграция хизматига талабгорларнинг судланганлиги ҳақидаги маълумотлар базасидан кенгроқ фойдаланиш имконини бериш тўғрисидаги қароридан келиб чиқди.

Агентлик вакили назоратни кучайтириш ҳамда федерал судланганлик маълумотлар базасига кириш имкониятини кенгайтириш орқали ариза берувчиларни текширишни кучайтириш учун хавфсизлик бўйича янги чоралар жорий этилгани ҳақидаги маълумотни тасдиқлади.