Яқин ўтмишда Ширин шаҳридаги Нуробод маҳалласи ёшларининг спорт билан машғул бўлишлари учун шароит йўқ эди, масалан, белбоғли ва бел олиш кураш турлари билан тор хоналарда шуғулланарди. Маҳалладаги 4-умумтаълим мактабига қарашли ягона спорт зали эса ўқувчилар билан банд бўлар, кун бўйи деярли бўшамас эди. Сўнгги йилларда спортни янада оммалаштириш борасида амалга оширилган ислоҳотлар натижасида Нурободдаги ушбу ҳолат тубдан ўзгарди. Маҳаллада бутун бир спорт мажмуаси пайдо бўлди. Яъни, бугунги кунда 4-мактаб тасарруфида бир эмас, тўртта спорт иншооти борки, улардан маҳалла аҳолиси ҳам самарали фойдаланмоқда.

Хусусан, 2022 йилда замонавий стрит воркоут майдончаси барпо этилди. Сўнгра 2025 йилда “Ташаббусли бюджет” лойиҳасидаги ғалаба натижасида 12х24 метр ўлчамли замонавий кураш зали қурилди. Айтиш лозимки, мазкур зал бежиз Нурободда бунёд этилгани йўқ. Гап шундаки, мазкур маҳалла ва унинг атроф -жавонибида, жумладан Қайирма қишлоғида азалдан кураш, айниқса, белбоғли курашга қизиқиш жуда ҳам кучли. Ҳудуддан мазкур спорт тури бўйича машҳур, кўраги ерга тегмаган марди майдон полвонлар етишиб чиққан. Шунингдек, маҳаллада катта футбол стадиони, сунъий қопламали мини-футбол майдони ҳам бор.

Эътиборлиси, Нурободда спорт инфратузилмаси яхшиланиши билан бир қаторда мураббийлар таркиби ҳам шакллантирилди. Ширин шаҳар спорт мактаби томонидан белбоғли кураш бўйича Тохир Холқўзиев, кураш бўйича Ҳусниддин Юлдошев ва регби бўйича Ҳайитбой Абдуллаев мазкур маҳаллага бириктирилди. Бугунги кунда улар жами 160 нафардан зиёд ўғил-қиз билан мунтазам машғулот олиб бормоқда. Шунингдек, вилоят футбол мактаби тренери Улуғбек Келдиев раҳбарлигида 40 нафар ёш футбол сир-асрорларини ўрганаётир. Маҳаллада спортни ривожлантириш фидойиларидан бири Улуғбек Эшиев эса жисмоний маданият бўйича олий маълумотли мутахассис бўлиши баробарида “Улуғбек полвон” номи билан танилган, бир неча бор Ўзбекистон чемпиони, Осиё ва жаҳон чемпионатлари совриндори, кўплаб халқаро мусобақалар ғолиби бўлган спортчидир. Шунингдек, у Ўзбекистон спорт ва халқаро тоифадаги спорт устаси, олий тоифали тренер, олий тоифали йўриқчи-услубчи ва халқаро тоифадаги ҳакам унвонларига эга. Улуғбек Эшиев ҳозирда жамоатчилик асосида Ўзбекистон Белбоғли, Бел олиш кураш ва уч кураш миллий Ассоциациясининг Сирдарё вилояти бўлими раиси вазифасини ҳам бажариб келмоқда.

—Маҳаллада спортни оммалаштириш ва ривожлантириш бўйича Нуробод маҳалласида тўпланган тажриба яна бир бор шуни тасдиқламоқдаки, спорт инфратузилмасига киритилган сармоя келажак авлоднинг жисмоний ва маънавий камолотига қаратилган муҳим инвестициядир, -дейди Улуғбек Эшиев. - Нурободда барпо этилган спорт иншоотлари ва қўлга киритилаётган ютуқлар маҳалла ёшларининг орзу ва интилишларини рўёбга чиқариш йўлида мустаҳкам пойдевор бўлиб хизмат қилмоқда. Бу ердаги ҳар бир янги майдонча, ҳар бир машғулот ва ҳар бир ғалаба келажак чемпионларига очилаётган янги йўл демакдир.

Маҳаллада яратилган имконият ва шароитлар ўз самарасини бермоқда, илгари маҳаллада деярли ривожланмаган спорт турлари бугун кенг оммалашиб, ёшлар турли мусобақаларда муносиб иштирок этмоқда. Маҳалла спортчилари, айниқса, Олимпия спорт турларидан бири саналган регби бўйича вилоят мусобақаларида ғолиб ва совриндорлар сафидан жой олмоқда. Яқинда ўтказилган “Янги Ўзбекистон Олимпия чўққилари”, “Президент Олимпиадаси” ҳамда “Ҳоким Олимпиадаси” мусобақаларида нурободлик спортчилар юқори натижаларга эришди. Дзюдо бўйича Асалхон Бўстонова биринчи ўринни, Чарос Бўстонова ва Абдурасул Ашуров эса учинчи ўринларни қўлга киритди. Аёллар курашида ҳам Асалхон Бўстонова олтин, Чаросхон Бўстонова эса бронза медали соҳибаси бўлди. Шунингдек, жорий йил май ойида ўтказилган “Вилоят прокурори кубоги” мусобақасида ҳам маҳалла ёшлари муносиб иштирок этди. Унда Асалхон Бўстонова ғолибликни қўлга киритган бўлса, Ирода Рахматова, Исломиддин Абдуғаниев ва Азизбек Холиқов совриндорлар қаторидан жой олди.

Ҳа, айтгандек, нурободликлар маҳалладаги спорт инфратузилмасини янада яхшилаш мақсадида яна бир лойиҳа тайёрламоқда. Ушбу лойиҳа амалга ошса, мактабнинг катта футбол майдони ҳам замонавий қиёфага келтирилади. Аминмизки, спортга, ёш авлодга эътибор шу тариқа ошиб бораверса, нурободлик спортчилар довруғи эларо достон бўлади.

Аҳмадали ШЕРНАЗАРОВ,

“Халқ сўзи”.