Австрия пойтахти Вена шаҳрида БМТнинг Жиноятчиликнинг олдини олиш ва жиноий одил судлов комиссиясининг 35-сессияси бўлиб ўтди. Нуфузли халқаро тадбирда дунёнинг 175 та давлатидан 1,5 мингдан зиёд юқори мартабали раҳбарлар, соҳа экспертлари ва мутахассислар иштирок этди. Диққатга сазовор жиҳати, жорий йилда Ўзбекистон илк бор ушбу нуфузли тузилмага тўлақонли аъзо сифатида қатнашди.

Саида Мирзиёева ўз нутқида сўнгги йилларда Ўзбекистонда одил судлов тизимини такомиллаштириш, хотин-қизлар ва болалар ҳуқуқларини ишончли ҳимоя қилиш, жиноятчилик профилактикасини кучайтириш ҳамда ёшларни ҳар томонлама қўллаб-қувватлаш борасида амалга оширилаётган кенг кўламли ислоҳотлар ва ижобий натижаларга алоҳида тўхталиб ўтди.

Шунингдек, у глобал хавф-хатарларга қарши кучларни бирлаштириш зарурлигини таъкидлади.

«Кибержиноятчилик, коррупция ва оилавий зўравонлик чегара билмайди. Шу сабабли уларга қарши очиқ мулоқот, ўзаро тажриба алмашиш ва халқаро ҳамкорлик орқали биргаликда курашишимиз зарур», — дея баёнот берди Саида Мирзиёева.

Ўзбекистоннинг ушбу нуфузли комиссияга аъзолиги мамлакатимизнинг халқаро ҳуқуқ-тартибот ва инсон ҳуқуқларини ҳимоя қилиш соҳасидаги ташаббуслари халқаро ҳамжамият томонидан юқори баҳоланаётганидан далолат беради.