Андижон вилоятида туяқушчилик йўналиши учун ажратилган ер майдонини сотаётган фермер хўжалиги раҳбари ушланди. Бу ҳақида Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Хонобод шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Унда «Ф-Д.» фермер хўжалиги раҳбари Ш.М. фермер хўжалигига Хўжаобод тумани ҳокимининг тегишли қарорига асосан туяқушчилик йўналиши учун ажратилган ер майдонининг 1 гектарини фуқаро М.Х.га 20 000 АҚШ доллари эвазига гўёки кадастр идораларида ишловчи танишлари орқали чорвачилик йўналиши учун ажратиб, қурилиш ишларини амалга ошириш учун ҳужжатларини тайёрлаб беришини ваъда қилиб, олдиндан бўнак сифатида 10 000 АҚШ долларини олган вақтида ашёвий далиллар билан қўлга олинган.

Ҳозирда мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.