Зарарли дастурларни сотиш билан шуғулланган шахсга нисбатан жиноят иши қўзғатилди. Бу ҳақида «Хавфсизлик» Telegram-канали хабар берди.

Маълум қилинишича, Давлат хавфсизлик хизмати ва Тошкент шаҳар Ички ишлар бош бошқармаси ходимлари ҳамда «Киберхавфсизлик маркази» ДМ мутахассислари ҳамкорлигида тезкор тадбир ўтказилган.

Унда «Telegram» мессенжерида зарарли «APK» дастурларни сотиш билан шуғулланган шахс фаолиятига чек қўйилган. Аниқланишича, Тошкент вилоятининг Чирчиқ шаҳрида яшовчи, 2005 йилда туғилган фуқаро ўзи яратган зарарли «APK» дастурларини 100-300 минг сўм эвазига «Telegram» орқали 10 га яқин аккаунт фойдаланувчиларига сотган.

Ушбу шахс ўзи сотган зарарли дастурларни сотиб олган мижозларни техник жиҳатдан қўллаб-қувватлаб, уларга фойдаланиш жараёнида юзага келган муаммолар бўйича маслаҳатлар берган.

Билдирилишича, мазкур «APK» дастурлари ёрдамида ўзгаларнинг «Telegram» мессенжеридаги аккаунтларига рухсатсиз уланиш, телефонларидаги СМС хабарларни ўқиш ҳамда тўлов тизимларидаги пул маблағларини ўзлаштириб олиш мумкин.

Қонунбузар шахс «Telegram» мессенжеридаги 5 дан ортиқ гуруҳ ва каналларнинг администратори ҳисобланиб, уларда доимий равишда зарарли «APK» дастурларнинг имкониятлари тўғрисида постлар жойлаштирган.

Тезкор тадбир давомида ундан 1 дона «Asus ExpertBook» русумли ноутбук, 1 дона «Redmi Note 10 Pro» русумли телефон аппарати, 1 дона қаттиқ диск ва 2 дона банк пластик картаси ашёвий далил сифатида расмийлаштириб олинган.

Ҳозирда мазкур шахсга нисбатан жиноят иши қўзғатилиб, тергов ҳаракатлари олиб борилмоқда.

«Ҳурматли фуқаролар, кундалик ҳаётда шу каби қонунбузилиш ҳолатларига дуч келсангиз ДХХнинг 1520 қисқа рақамига қўнғироқ қилиб, хабар беринг. Шахсингизнинг сир сақланиши кафолатланади», — дейилади хабарда.