Ижтимоий тармоқларда Тошкент метрополитенида электрон тўловлар билан боғлиқ муаммоли вазиятлар бўлаётгани тўғрисидаги хабарлар кенг тарқалди.

Мазкур ҳолат юзасидан «Тошкент метрополитени» ДУК «Автоматлаштирилган транспорт тўлов тизими оператори» акциядорлик жамиятидан (АТТО) олган маълумотларига асосан, муносабат эълон қилди.

Унда айтилишича, бугунги кунда метрополитен хизматларидан фойдаланиш учун йўловчилар АТТО ягона транспорт тўлов тизими карталари, шунингдек, Ўзбекистон Республикасида амал қилувчи деярли барча банк карталари орқали тўловларни амалга ошириш мумкин бўлади. Бундан ташқари, Visa, Mastercard ҳамда China UnionPay каби халқаро тўлов тизимлари орқали ҳам хизматдан эркин фойдаланиш имконияти мавжуд.

Амалдаги тартибга кўра, банк карталари орқали бир вақтнинг ўзида 5 тагача тўловни амалга ошириш мумкин. Ушбу тартиб тизимнинг барқарор ишлашини таъминлаш, хавфсизлик чораларини кучайтириш ҳамда барча йўловчилар учун қулай ва узлуксиз хизмат кўрсатишни кафолатлаш мақсадида жорий этилган бўлиб, умумий фойдаланиш жараёнига ҳеч қандай тўсқинлик қилмайди.

Шунингдек, йўловчилар учун 10 дан ортиқ мобил иловалар орқали тўлов қилиш имконияти мавжудлиги ҳамда замонавий ва инновацион ёндашув сифатида барча метро бекатларида кафт орқали (биометрик) тўлов ҳамда юзни аниқлаш орқали тўлов тизимлари ҳам жорий этилган.

Бундан ташқари, барча бекатларда ўзига ўзи хизмат кўрсатиш имконини берувчи инфокиоскалар ўрнатилган бўлиб, улар орқали нақд пул билан ҳам тез ва қулай тарзда тўловларни амалга ошириш мумкин.

«Агар сизда тўлов тизимига алоқадор муаммолар юзага келса, АТТО алоқа марказининг +998781400808 рақамига мурожаат қилишингиз мумкин», — дейилади «Тошкент метрополитени» хабарида.