Олий Мажлис Сенати ҳузуридаги Ёшлар парламенти томонидан Германия халқаро ҳамкорлик жамияти (GIZ) билан ҳамкорликда ташаббускор ёшлар учун «Барқарор тинчлик учун ёшлар ҳаракати» танлови ва ўқув семинари ташкил этилди.

Икки босқичда ўтказилган танловда 100 нафардан ортиқ ёшлар иштирок этиш учун ариза топширди. Саралаш босқичлари якунига кўра ҳудудларда жамоа билан ишлаш, маҳаллий даражадаги муаммоларга амалий ечим топиш ҳамда ёшларнинг ижтимоий фаоллигини оширишга қаратилган ташаббусларни илгари сура оладиган 15 нафар иштирокчи саралаб олинди.

Уч кун давом этган интенсив семинар машғулотларида иштирокчиларнинг ҳуқуқий саводхонлиги ва ижтимоий масъулиятини оширишга алоҳида эътибор қаратилди. Тажрибали эксперт ва тренерлар томонидан ёшлар ўртасида ҳуқуқбузарликларнинг олдини олиш, болаларга нисбатан зўравонликка қарши курашишнинг психологик ва ҳуқуқий жиҳатлари бўйича тушунчалар берилди.

Шунингдек, бугунги ахборот маконида долзарб саналган медиа саводхонлик, манипулятив контентлар ва фейк хабарларни аниқлаш усуллари юзасидан маҳорат дарслари ташкил этилди.

Лойиҳа доирасида иштирокчилар гуруҳларга бўлинган ҳолда ўз ҳудудларидаги долзарб муаммоларга ечим бўладиган лойиҳаларини ишлаб чиқдилар. Жумладан, ногиронлиги бўлган ёшларни қўллаб-қувватлаш, медиа саводхонликни ривожлантириш, гиёҳвандликнинг олдини олиш ҳамда китобхонликни тарғиб қилиш йўналишларидаги лойиҳалар тақдим этилди.

Ўқув семинари якунида муваффақиятли иштирок этган ёшларга ташкилотчилар томонидан махсус сертификатлар ва эсдалик совғалари топширилди.