АҚШ президенти Дональд Трамп иштирок этган тадбирда отишма уюштиришда гумонланаётган шахс сайловларда унинг рақиби Камала Харрис кампанияси учун маблағ ўтказгани маълум бўлди. Бу ҳақда Los Angeles Times нашри хабар қилди.

Нашрга кўра, у 2024 йил октябрь ойида демократлар учун маблағ йиғувчи ActBlue сиёсий қўмитасига 25 доллар хайрия қилган. Гумонланувчи тезкор тарзда қўлга олинган, Секрет сервис ходимларидан бири яраланган.

New York Post журналисти Кэрол Маркович маълум қилишича, ушбу шахс 31 ёшли Коул Томас Аллен бўлиб, у Калифорния штатидаги Торрас шаҳрида яшайди ва ўқитувчи сифатида фаолият юритади. У сайловчи сифатида ҳеч қайси партияни қўллаб-қувватламайдиган мустақил сайловчи сифатида рўйхатдан ўтган.

Қайд этилишича, Аллен 2017 йилда Калифорния технология институтини машинасозлик йўналиши бўйича тамомлаган, 2025 йилда эса информатика соҳасида магистратурани битирган. 2020 йилдан бери у C2 Education таълим марказида ишлаб келади ва 2024 йилда ушбу муассасада “Ой ўқитувчиси” деб топилган.

Шунингдек, Коул Томас Аллен инди-ўйинлар яратиш билан ҳам шуғулланган. 2018 йилда Steam платформасида унинг шутер жанридаги ўйини чиқарилган. CBS телеканали манбаларига кўра, у ҳуқуқ-тартибот идораларига асосий нишони Трамп маъмурияти амалдорлари бўлганини айтган.