Андижон вилоят ҳокимлиги, вилоят ветеринария ва чорвачиликни ривожлантириш бошқармаси ташаббуси билан Олтинкўл туманидаги “Бахт имкон ривожи” фермер хўжалигида ўқув — амалий семинар ўтказилди. Унда чорвачилик ва ветеринария тизими мутасаддилари, таниқли олимлар,илғор чорвадорлару юзлаб тажрибали ветврачлар иштирок этишди ҳамда мазкур наслчилик фермер хўжалиги салоҳияти билан яқиндан танишди. Эпизоотик тадбирлар ижроси, жониворларни сунъий уруғлантиришга масъул техник осеминаторлар фаолияти, маҳорати кўпчилик эътиборини тортди.

—Бугун озиқ-овқат маҳсулотларига талаб кучайган маҳал давлатимиз раҳбарининг фармон ва қарорларига таянган ҳолда чорвачиликни тубдан ривожлантириш ҳар қачонгидан-да муҳимдир,— деди тадбирда сўз олган вилоят ҳокимининг қишлоқ хўжалиги масалалари бўйича ўринбосари Улуғбек Одашевич Раҳимов. — Қани энди вилоятимизда мана шу ферманинг эгаси сингари ташаббускор тадбиркорлар янада кўпайса. Биз доимо мўл ва сифатли маҳсулотлар ишлаб чиқаришни кўпайтиришга астойдил киришган фермерларни ҳар томонлама қўллаб қувватлаймиз.

Тадбирда таъкидланганидек, 18 апрелдан бошланиб 18 майга қадар давом этадиган хавфли касалликларга қарши эмлаш республика ойлиги Андижон вилоятида ҳам авж паллага кирган. Маҳалла фаоллари, чорвадор фермерлар ва аҳоли ветеринария ходимларига яқиндан кўмаклашмоқда.

Вилоят ветеринария ва чорвачиликни ривожлантириш бошқармаси бошлиғи Дилмурод Қаюмовнинг сўзларига кўра, мутахассисларнинг иш самарадорлиги уларнинг малакасию моддий — техник аҳволига ҳам боғлиқ. Давлатимиз раҳбари бу масалага ҳам эътибор қаратганлар. Президентимизнинг ўтган йил 30 январдаги ПҚ-34-сон қарори ва ҳукуматимизнинг шу йил 20 апрелдаги 190- сонли қарорларига мувофиқ айнан Андижон вилояти бўйича 99 та сосуд-дюар идишлар, 20 та музлаткич ва бошқа воситалар харид қилинди.

—Биз ана шу воситалару асбоб- ускуналарни бугун марказдан олисдаги фаол ветврачларга, осеминаторларга тантанали равишда топширдик. Бу эътибор барча мутахассисларни беҳад қувонтирди, — дейди Дилмурод Қаюмов. — Эмлаш ойлиги доирасида эса жами 329 та чорвачилик фермер хўжаликлари ҳамда 263 минг 265 та аҳоли хонадонларидаги мавжуд чорвани тўлиқ назоратдан ўтказишни режалаштирганмиз. Барча туманларда эпизоотик тадбирлар ижросига эрта тонгданоқ киришилмоқда. Мақсад ветеринария хизмати борасида муаммоларга ҳожат қолдирмасликдан иборатдир.

Абдунаби АЛИҚУЛОВ, “Халқ сўзи”.