Йирик миқдордаги гиёҳвандлик воситасининг мамлакатимиз ҳудуди орқали ноқонуний олиб ўтилиши тўхтатиб қолинди. Бу ҳақида Давлат божхона қўмитаси хабар берди.

Маълум қилинишича, Бухоро вилояти божхона бошқармасининг Контрабандага қарши курашиш бўлими ҳамда «Олот» чегара-божхона пости ходимлари томонидан Давлат хавфсизлик хизмати ва Чегара қўшинлари ҳарбий хизматчилари билан ҳамкорликда тезкор тадбир ўтказилган.

Унда жорий йилнинг 30 май куни «Олот» чегара-божхона пости орқали Афғонистондан Россия Федерациясига ҳаракатланаётган юк автотранспорт воситаларидан бири божхона назоратидан ўтказилган. Инспекцион кўрик мажмуаси орқали олинган тасвирларни синчковлик билан таҳлил қилган божхона ходимлари юк таркибидаги айрим шубҳали ҳолатларни ўз вақтида илғаган.

Аниқланишича, тиркамадаги 18,6 тонна қадоқланган ўрик қоқиларининг рентген тасвирлари чуқур таҳлил қилинганда, айрим қутилар ичида ноодатий жисмлар мавжудлиги маълум бўлган. Шундан сўнг юк белгиланган тартибда ва холислар иштирокида батафсил кўздан кечирилган. Текширув жараёнида 13 та қоғоз қутидаги ўрик қоқилари орасига ташқи кўриниши жиҳатидан айнан ўрик қоқисига ўхшатиб тайёрланган ва маҳсулотларга аралаштириб яширилган гиёҳвандлик моддалари борлиги фош этилган.

Эксперт-криминалистика хулосасига кўра, мазкур моддалар умумий оғирлиги салкам 13 килограмм бўлган «героин» гиёҳвандлик воситаси экани маълум бўлган. Божхоначилар томонидан тўхтатиб қолинган салкам 13 килограмм героиннинг дунё қора бозорларидаги қиймати 1,5 миллион долларгача баҳоланяпти. Бу эса минглаб дозадаги гиёҳвандлик воситасининг яширин муомалага кириб бориши ва кўплаб ёшларни заҳарлаб, жиноят оламига етаклашининг олди олинганини англатади.

Ҳозирда мазкур ҳолат юзасидан божхона органлари томонидан жиноят иши қўзғатилган.

Маълумот учун, жорий йилнинг ўтган даври мобайнида республикамиз божхоначилари 363 та ҳолатда 1,7 тоннага яқин гиёҳвандлик воситаларининг божхона чегаралари орқали ноқонуний равишда олиб ўтилиши ва ички ҳудуддаги яширин айланмасига чек қўйишган. Олиб қўйилган наркотик моддалар ўтган йилнинг шу даврига нисбатан 461 килограммга кўпайган.