FIFA рефериси Рустам Лутфуллин Суперлиганинг биринчи давраси якунига қадар мусобақадан четлатилди. Бу ҳақда Ўзбекистон футбол ҳакамлар маркази ўзининг расмий саҳифасида маълумот берди.

“Ҳакамлар қўмитасининг навбатдаги йиғилиши бўлиб ўтди. Кун тартибидаги биринчи масала:

Ҳакамликни ривожлантириш йўналишида ЎзФҲМ тасарруфида ташкил этилган Ҳакамлар академияси фаолиятини янада такомиллаштириш, жумладан, назарий ва амалий машғулотларни сифатли ташкил этиш, ёш ҳакамлар учун кенг имкониятлар яратиш, уларнинг ўз устида ишлаши учун зарур шарт-шароитларни таъминлаш, республика мусобақалари давомида маҳорат ва тажриба орттиришларига кўмаклашиш, шунингдек, чет тилларини ўрганишга алоҳида эътибор қаратиш масалалари қайд этилди“, — дейилади марказ хабарида.

Шунингдек, йиғилишнинг иккинчи қисмида Суперлигада ҳакамларнинг сўнгги вақтлардаги хатоликлари танқидий руҳда кўриб чиқилди. Бу борада марказ хабарида қуйидагилар маълум қилинган:

“Суперлига 5-тури доирасидаги “Сурхон” – “Бухоро” учрашуви бош ҳаками Фирдавс Норсафаров ўйин қоидаларини бир хил мезонда қўлламаганлиги, 6-тури доирасидаги “Андижон” – “Навбаҳор” учрашуви бош ҳаками Найим Қосимов томонидан “Андижон” жамоаси бош мураббийига нисбатан етарли даражада қатъий чоралар кўрилмагани, шунингдек, 6-турда “Қўқон-1912” – “Насаф” учрашувида бош ҳакам Рустам Лутфуллин ва VAR ҳаками Иброҳим Исмоилов томонидан қўпол хатоликларга йўл қўйилгани қайд этилди.

Ҳакамлар қўмитаси қарорига кўра, аниқланган камчиликлар учун Найим Қосимов ва Фирдавс Норсафаров огоҳлантирилди.

“Қўқон-1912” – “Насаф” баҳсини бошқариб борган бош ҳакам Рустам Лутфуллин ҳамда VAR ҳаками Иброҳим Исмоилов йўл қўйган хатолари учун Суперлига, Пролига ва Ўзбекистон кубоги баҳсларидан биринчи давра якунига қадар четлаштирилди. Шунингдек, ҳар икки ҳакам Биринчи лигага туширилди“.