Шу кунларда Сурхондарёнинг тоғу адирлари баҳор фаслида яна бир маданий тадбирни қарши олишга тайёргарлик кўрмоқда. Қадимий анъаналар, халқ оғзаки ижоди ва мусиқа билан уйғунлашган муҳитда “Бойсун баҳори” фестивали навбатдаги мавсумини бошлайди. Унда миллий қадриятлар ва тарихий мерос кенг намойиш этилади.

Жорий йилнинг 1–7 май кунлари ўтказиладиган мазкур халқаро фольклор фестивалида дунёнинг турли бурчакларидан келган жамоалар иштирок этиши кутилмоқда. Қирқдан ортиқ давлатдан юзлаб ижодкорлар Бойсун бағрида жам бўлиб, ҳар бири ўз халқининг ўзига хос жиҳатларини намоён қилади. Фестиваль давомида яратилган муҳит турли миллат вакилларини бир нуқтада туташтиради.

Бу йилги дастур янада мазмунли. Ҳар бир ҳудуд учун алоҳида қўрғонлар барпо этилиб, уларда тарих, таомлар ва ҳунармандчилик намуналари уйғун ҳолда кўрсатилади. Томошабин бир неча қадам ташлаб, турли ҳудудларга хос маънавий муҳитни ҳис қилади.

Фестивал майдонига кириш йўлаклари алоҳида эътиборга лойиқ. 180 метрга чўзилган миллий руҳдаги йўлаклар саккиз хил мавзуда безатилган. Бу ерда доира садоси, дўппилар нақши, адрас ва атлас матоларининг жилоси, амалий санъат намуналари бир-бирига уйғунлашиб, келган меҳмонда байрамона таассурот уйғотади.

— Бойсун баҳори инсон қалбига маънавий озуқа беради, халқларни яқинлаштиради, — дейди Республика Маънавият ва маърифат маркази Сурхондарё вилояти бўлими раҳбари Наргиза Раҳматуллаева. Бу ерда ҳар бир иштирокчи ўзлигини янада чуқур ҳис қилиши учун катта тайёргарлик кўрилмоқда. Бу йилги янгиликлардан бири ҳунармандлар меҳнати билан яратилган улкан қуроқ кўрпа бўлди. Узунлиги 33 метрдан ортиқ, эни беш метрга яқин ушбу ноёб асар ярим йиллик меҳнат самараси. Бойсунлик Назокат Собирова бошчилигидаги моҳир ҳунармандлар ҳар бир парчани улаб, турли услубларни ягона композицияга бирлаштиришган. Фестивалда ушбу қўл меҳнати маҳсули намойиш этилади.

Тадбир давомида фольклор чиқишлари, миллий спорт ўйинлари, концерт дастурлари ва миллий таомлар кўргазмалари ташкил этилади. Бойсун бу кунларда нафақат меҳмонларни, балки турли маданият ва анъаналарни ҳам бир жойга жамлайди. Шу боис, фестиваль ҳар бир иштирокчи ва томошабин хотирасида узоқ сақланадиган таассуротлар қолдириши шубҳасиз.

Фарҳод ЭСОНОВ, “Халқ сўзи”.