АҚШ Давлат котиби Марко Рубио Куба Вашингтоннинг душманларига ҳарбий ва разведка операцияларини ўтказиш учун ўз ҳудудини тақдим этаётганини маълум қилди. Унинг сўзларини ТАСС келтирмоқда.

«Улар [Куба расмийлари] АҚШ душманлари учун «қизил гилам» тўшаб, уларга Куба ҳудудида миллий манфаатларимизга зид равишда жазосиз ҳаракат қилиш имконини беришди. Биз хорижий давлатлар томонидан Қўшма Штатлар қирғоқларидан 90 мил (144 км) узоқликда ҳарбий ёки разведка операциялари ўтказилишини жазосиз қолдирмаймиз», — деди Рубио Fox News телеканалига берган интервьюсида.

Аввалроқ АҚШ Конгрессининг юқори палатаси президент маъмуриятига қонунчилик ҳокимияти рухсатисиз Кубага қарши ҳарбий куч ишлатишни тақиқлаш талаби кўзда тутилган резолюцияни кўриб чиқиш таклифини блоклаб қўйган эди.

Март ойида Америка етакчиси Дональд Трамп Вашингтон Эронга қарши ҳарбий операция якунланганидан сўнг Кубага нисбатан кейинги ҳаракатлар курсини ишлаб чиқиш ниятида эканини маълум қилган эди.