Сенатнинг Фан, таълим ва соғлиқни сақлаш масалалари қўмитаси раиси Б.Абдуллаев бошчилигидаги ишчи гуруҳ Қашқадарё вилоятида таълим тизимидаги раҳбар ва педагог ходимлар малакасини ошириш, уларни қайта тайёрлаш бўйича белгиланган вазифалар ижросини ўрганмоқда.

2025 йилдан бошлаб мактабгача ва мактаб таълими ташкилотларидаги раҳбар, педагог ва мутахассис кадрларнинг 5 йилда бир марта малакасини ошириш тизими жорий қилинди. Педагог кадрлар onlinedu.uz махсус электрон платформаси орқали онлайн ҳамда анъанавий тарзда малака оширишмоқда.

Ишчи гуруҳ Қашқадарё вилоятида раҳбар ва педагог ходимларнинг малака ошириш курсларига жалб қилиниши билан танишди. Жумладан, 2025 йилда Қашқадарё вилояти педагогик маҳорат марказида 12 058 нафар раҳбар ва педагог ходим малака ошириш курсида ўқитилиб, сертификат олган. Жорий йилнинг январь март ойларида 2 827 нафар раҳбар, педагог ва ходим малака ошириш курсида ўқитилди.

Вилоятда умумий ўрта таълим муассасалари директорлари учун ҳам ўқув курслари ташкил этилган. Жалб этилган 97 нафар директорнинг 33 нафари (34 %) ижобий кўрсаткич билан сертификатга эга бўлган, қолган 64 нафари (66 %) якуний синов натижаларига кўра курсни муваффақиятли тамомламаган деб топилган.

Шунингдек, умумий ўрта таълим муассасалари директори лавозимига номзодлар учун ташкил этилган менежерлик ўқув курсларига қабул қилинган жами 301 нафар тингловчидан 127 нафари (42,2%) ижобий натижа билан курсни тамомлаган ва 174 нафари (57,8 %) курсни муваффақиятли тамомлай олмаган.

Ишчи гуруҳ Қарши шаҳри ва Шаҳрисабз туманлари мактабларида бўлиб, раҳбар ва педагог ходимлар билан суҳбатлашди, уларнинг малака ошириш ва қайта тайёрлаш тизимини такомиллаштириш юзасидан таклифлари билан танишди.

Вилоятдаги педагогик маҳорат маркази фаолияти билан ҳам танишилди. Унда раҳбар ва педагог ходимлар малакасини ошириш ва қайта тайёрлаш йўналишидаги ишлар бугунги кундаги янги авлод дарсликлари ва Миллий ўқув дастури талабларига қанчалик мослиги ўрганилди.

Ўрганиш якунлари Қўмита ҳамда халқ депутатлари Қашқадарё вилояти Кенгашининг қўшма мажлисида муҳокама қилинади ва Қўшма қарор қабул қилинади.