«Реал Мадрид» президентлиги учун номзодлардан бири Энрике Рикельме агар сайловда ғалаба қозонса, Жозе Моуриньюни жамоа бош мураббийи этиб тайинламаслигини маълум қилди.

«Агар сайловда ғалаба қозонсам, «Реал»га суперюлдуз даражасидаги мураббийни олиб келаман. Сиз тасаввур қила оладиган энг буюк мураббийни. Жозе Моуринью бизнинг мураббий эмас. Биз «Реал» мухлислари ҳақиқатдан ҳам истайдиган инсонни олиб келамиз», — деди Рикельме.

Унинг сўзларини журналист Фабрицио Романо келтириб ўтди.

Қизиғи шундаки, амалдаги президент Флорентино Перес эса сайловда ғалаба қозонган тақдирда бош мураббийликка айнан Жозе Моуриньюни қайтариш режаси борлигини маълум қилган эди.

Шунингдек, Рикельме аввалроқ бошқа манбага берган интервьюсида клуб бошқарувига келса, жамоага янги суперюлдузларни олиб келишга ҳаракат қилишини айтган. У Эрлинг Холанд ва Родри каби футболчиларнинг трансферини амалга оширишни мақсад қилиб қўйганини таъкидлаган.