Бугун, 30 апрель куни «Чегара билмас мухбирлар» халқаро ташкилоти (Reporters Without Borders / RSF) «Жаҳон матбуот эркинлиги индекси – 2026» рейтингини эълон қилди. Бу йилги индексда Норвегия биринчи ўринни эгаллади. Кейинги поғоналардан Нидерландия, Эстония, Дания ва Швеция жой олган. Шу тариқа, рейтингнинг энг юқори қисмида асосан Европа давлатлари қайд этилди.

Мазкур рейтингда Ўзбекистон 147-ўриндан жойлаштирилди. Марказий Осиё давлатлари орасида Қирғизистон 146-ўрин, Қозоғистон 149-ўрин, Туркманистон 173-ўринни эгаллаган. Бу кўрсаткич Ўзбекистон минтақада ўрта позицияларда турганини кўрсатади.

RSF томонидан эълон жадвал жами 180 та давлатни қамраб олган бўлиб, унда бир қатор йирик ва ривожланган давлатлар қуйи поғоналарда қайд этилганини ҳам кўриш мумкин. Хусусан, Россия 172-ўринни, Хитой эса 178-ўринни эгаллаган.

Шунингдек, 175-ўринни Афғонистон, 176-ўринни Саудия Арабистони, 177-ўринни Эрон, 179-ўринни Шимолий Корея ва 180-ўринни Эритрея банд этган. Бу ҳолат мазкур давлатларда матбуот эркинлиги билан боғлиқ жиддий муаммолар сақланиб қолаётганини кўрсатади.

Айтиш жоиз, мазкур рейтинг матбуот эркинлиги, журналистлар хавфсизлиги, ахборотга етиш имконияти ва оммавий ахборот воситалари фаолияти учун яратилган шарт-шароитлар асосида шакллантирилади. Индексда юқори ўрин эгаллаш давлатда сўз ва матбуот эркинлиги кенгроқ таъминланганини англатади.

Ҳар йили 3 май куни дунёда Жаҳон матбуот эркинлиги куни нишонланади. Ушбу сана муносабати билан эълон қилинадиган халқаро рейтинглар мамлакатларда сўз эркинлиги ҳолатига эътибор қаратиш, журналистлар ҳуқуқларини ҳимоя қилиш ва соҳадаги мавжуд муаммоларни муҳокама қилишда муҳим аҳамият касб этади.