Мамлакатимизда илм-фан ютуқларини иқтисодиётимизнинг реал секторларига жорий этиш, олимлар ва тадқиқотчиларнинг инновацион ғояларини қўллаб-қувватлаш давлат сиёсатининг устувор йўналишларига айланди. Ўзбекистон Республикаси Президентининг 20226 йил 4 апрелдаги «Мамлакатда янги ишланмалар асосида ишлаб чиқаришни ташкил этиш тизимини жорий қилиш ҳамда илм-фанни қўллаб-қувватлашнинг қўшимча чора-тадбирлари тўғрисида»ги ПФ-54-сонли Фармони бу борадаги ишларни янги босқичга олиб чиқмоқда.

Мазкур ҳужжатнинг мазмун-моҳиятини кенг жамоатчиликка етказиш мақсадида Ўзбекистон Миллий университети Жиззах филиалида ташкил этилган семинарда вилоятдаги барча давлат ва хусусий олим таълим муассасалари профессор-ўқитувчилари, ёш тадқиқотчилар ҳамда талабалар иштирок этишди. Тадбирда Инновацион ривожланиш агентлиги масъуллари янги тизимнинг афзалликлари ва соҳа вакиллари учун яратилаётган имкониятлар ҳақида батафсил маълумотлар бердилар.

Семинарнинг асосий мавзуси – илмий ишланмаларни тижоратлаштириш ва Spin-off корхоналарини ташкил этиш масаласи бўлди. Мутахассислар олий таълим муассасалари қошида кичик корхоналар очишнинг ҳуқуқий асослари, солиқ ва божхона имтиёзлари ҳамда давлат томонидан бериладиган грантлар, ишлаб чиқиладиган маҳсулотларни нафақат юртимизда балки хорижга ҳам экспорт қилиш масалалари механизмлар асосида тушунтириб берилди.

— Мени бугун яратган стартапим нафақат дастурий маҳсулот, балки илм-фан ва юқори технологияларнинг уйғунлашган намунаси сифатида эътироф этилмоқда. Лойиҳамнинг энг муҳим жиҳати, у фойдаланувчи билан «ўзидек» мулоқот қилиш, яъни адаптив мослашув алгоритмига асосланган, — дейди Ўзбекистон Миллий университети Жиззах филиали талабаси Озодбек Ражабқулов. — Бу тизим талаба билан мулоқотда содда ва тушунарли тилни танласа, тадқиқотчи ёки олим билан мулоқотда мураккаб илмий терминлар, аниқ маълумотлар, қисқа ва лўнда хулосалар асосида ишлайди.

Бугунги тезкор ва шиддатли замонда талабалар ҳам олимлар ҳам фақат назария билан чекланиб қолмаслик кераклигини даврнинг ўзиям кўрсатиб турибди. Президентимизнинг мазкур фармони илмий лабораторияларда яратилган ишланмаларни тайёр маҳсулот сифатида бозорга олиб чиқиш учун ҳуқуқий «кўприк» вазифасини ўтайди. Айниқса, олий таълим муассасалари қошида Spin-off корхоналарининг ташкил этилиши нафақат олимларнинг моддий манфаатдорлигини оширади, балки ҳудудий саноатнинг технологик жиҳатдан янгиланишига хизмат қилади.

Толибжон ЭРГАШЕВ, «Халқ сўзи».