Эрон атрофидаги низо туфайли дунёнинг 160 та давлатида 30 миллиондан ортиқ киши қашшоқлик ёқасига келиб қолиши мумкин. Бу ҳақда БМТ Тараққиёт дастури маъмури Александер Де Кроо маълум қилди, унинг сўзларини ТАСС келтирмоқда.

«Биз олти ҳафталик уруш якунлари бўйича тадқиқот ўтказдик ва ҳисоб-китобларимизга кўра, агар уруш ҳозирнинг ўзида тўхтаса ҳам, 160 та давлатда 32 миллион киши қашшоқликка дучор бўлади», — деди у AFP агентлигига.

Қашшоқлик ва низо келтириб чиқарган энергетика инқирози муаммоси айниқса Саҳрои Кабирдан жанубда жойлашган Африка мамлакатларига, шунингдек, Осиёнинг айрим давлатларига, масалан, Бангладеш ва Камбоджага жуда қаттиқ таъсир қилади.

Қашшоқлик билан боғлиқ вазият янада оғирлашмаслиги учун энергия манбалари ва озиқ-овқат учун субсидиялар кўринишида камида 6 миллиард доллар маблағ ажратилиши талаб этилади.