Корея давлатига ишга юбориш билан боғлиқ фирибгарлик ҳолатлари фош этилди. Бу ҳақида Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Косон тумани бўлими томонидан терговга қадар текширув ўтказилган.

Унда «И.А,» МЧЖ раҳбари С.Б. 48 нафар фуқарони ишончига кириб, 384 000 АҚШ доллари эвазига гўёки юқори лавозимларда ишловчи танишлари орқали Корея давлатига ишга юборишини айтиб, келишилган пулдан 28 800 АҚШ долларини фирибгарлик йўли билан қўлга киритганлиги аниқланиб, ушбу пуллар ҳисобидан 5 млн сўмнинг қайтарилиши процессуал тартибда расмийлаштирилган.

Департаментнинг Шеробод тумани бўлими томонидан ўтказилган терговга қадар текширувда фуқаро С.А. 2 нафар фуқарони миграция агентлигида ишловчи танишлари орқали Корея давлатига ишга юборишини айтиб, жами 24 000 АҚШ долларини фирибгарлик йўли билан қўлга киритганлиги аниқланган.

Шу каби яна бир ҳолат, Департаментнинг Навоий вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида ўтказилган терговга қадар текширувда ҳам фош қилинган.

Хусусан, фуқаро Б.Н. 3 нафар фуқаронинг ишончига кириб, уларни Корея давлатига юборишини айтиб, 22 200 АҚШ долларини фирибгарлик йўли билан қўлга киритганлиги маълум бўлган.

Департаментнинг Фарғона тумани бўлими томонидан ўтказилган терговга қадар текширувда фуқаролар муқаддам судланган М.А. ва Ш.Т. 3 нафар фуқаронинг ишончига кириб, уларни 33 000 АҚШ доллари эвазига Миграция агентилигида ишловчи танишлари орқали Корея давлатига ишга юборишини айтиб, 22 000 АҚШ долларини фирибгарлик йўли билан қўлга киритганликлари аниқланиб, ушбу пуллар ҳисобидан 1 200 АҚШ долларининг қайтарилиши процессуал тартибда расмийлаштириб олинган.

Қарши шаҳрида ўтказилган терговга қадар текширувда фуқаро С.Б. фуқаролар М.П. ва Ж.Ш.ни Корея давлатига ишга юборишини айтиб 21,5 млн сўм ва 600 АҚШ долларини фирибгарлик йўли билан қўлга киритганлиги аниқланган.

Бундан ташқари, Департаментнинг Жондор тумани бўлими томонидан ўтказилган терговга қадар текширувда фуқаро К.Қ. 3 нафар фуқаронинг ишончига кириб, уларни Корея давлатига ишга юборишини айтиб, 19 000 АҚШ долларини фирибгарлик йўли билан қўлга киритганлиги аниқланиб, ушбу пуллар ҳисобидан 2 млн сўмнинг қайтарилиши процессуал тартибда расмийлаштириб олинган.

Кореяга ишга юбориш билан боғлиқ ноқонуний ҳолатлар Чортоқ, Учқўрғон, Китоб тумани ҳамда Фарғона шаҳрида ҳам фош этилган.

Жумладан Чортоқ туманида ўтказилган терговга қадар текширувда фуқаро Х.Ш. фуқаролар М.Д. ва А.Д.ни миграция агентлигида ишловчи танишлари орқали Корея давлатига ишга юбориш ва имтиҳонлардан ўтказишни ваъда қилиб, 19 000 АҚШ долларини фирибгарлик йўли билан қўлга киритганлиги аниқланган.

Учқўрғон туманида эса фуқаро Б.К. фуқаро Н.М.нинг ишончига кириб, уни Корея давлатига ишга юборишини айтиб, 9 000 АҚШ долларини фирибгарлик йўли билан қўлга киритганлиги фош этилган.

Департаментнинг Китоб тумани бўлими ходимлари томонидан ўтказилган терговга қадар текширувда фуқаролар Н.Р. ва Р.Қ. 12 000 АҚШ доллари эвазига фуқаро Ё.О.ни Корея давлатига ишга юборишларини айтиб, шундан 6 600 АҚШ долларини фирибгарлик йўли билан қўлга киритганликлари аниқланиб, ушбу пуллар ҳисобидан 2 млн сўмнинг қайтарилиши процессуал тартибда расмийлаштириб олинган.

Фарғона шаҳрида ўтказилган терговга қадар текширувда фуқаро М.Ф. 2 нафар фуқаронинг ишончига кириб, уларни 20 000 АҚШ доллари эвазига миграция агентлигида ишловчи танишлари орқали Корея давлатига ишга юборишини айтиб, шундан 6 000 АҚШ долларини фирибгарлик йўли билан қўлга киритганлиги аниқланиб, ушбу пуллар ҳисобидан 200 АҚШ долларининг қайтарилиши процессуал тартибда расмийлаштирилган.

Ҳозирда юқоридаги ҳолатлар юзасидан Жиноят кодексининг 168-моддаси (фирибгарлик) ва 25, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.