Миграция агентлигининг хабар беришича, Россия Федерациясининг «Давлат чегараси тўғрисида»ги қонунига киритилган ўзгартишлар ва амалдаги тартибларга кўра, чегара назорати кучайтирилган.

Маълум қилинишича, эндиликда Россияга кириш ёки чиқишда мобил телефон, планшет ҳамда ноутбук каби электрон қурилмалар кўздан кечирилиши мумкин.

Чегара ходимлари қурилманинг ташқи кўринишини текшириш, зарур ҳолларда кўрсатишни талаб қилиш ҳуқуқига эга бўлади.

Миграция агентлиги ушбу текширувлар ҳаммага эмас, балки қоидабузарлик гумони бўлганда, хавфсизлик нуқтаи назаридан зарур деб топилганда амалга оширилишини қўшимча қилган.

Талабларга бўйсунмаслик тахминан 5 000 – 7 000 рублгача жарима ёки 15 суткагача маъмурий қамоққа сабаб бўлиши мумкин.

«Чоралар хавфсизликни кучайтириш, терроризм ва ноқонуний миграцияга қарши курашиш мақсадида жорий этилган. Сафар олдидан гаджетларингиздаги маълумотларга эътибор беринг», — дейилади агентлик хабарида.