Андижонда олдиндан кузатувга олинган шахс гиёҳвандлик воситаларини сотишга уринган вақтида тўхтатиб қолинди. Бу ҳақида Давлат божхона қўмитаси хабар берди.

Унда айтилишича, вилояти божхона бошқармаси тезкор тузилмалари томонидан Давлат хавфсизлик хизмати ва Ички ишлар идоралари билан ҳамкорликда тезкор тадбир ўтказилган.

Унда фуқаролардан бири ўзи истиқомат қилаётган хонадон олдида 1 дона полиэтилен ўрамдаги гиёҳвандлик воситасини 5 минг АҚШ долларига сотаётган вақтида тўхтатиб қолинган. Мазкур ўрам белгиланган тартибда ва холислар иштирокида очиб кўрилганида, унинг ичидаги модда салкам 400 гр. «гашиш» гиёҳвандлик воситаси эканлиги маълум бўлган.

Шу каби яна бир ҳолат, Хонобод шаҳрида ўтказилган тезкор тадбирда аниқланиб, гиёҳвандлик воситалари савдосининг олди олинган.

Хусусан, тезкор тадбир давомида олдиндан кузатувга олинган шахснинг дастлаб ёнида ва автотранспорт воситасида 8 та бўлакда салкам 33 гр. «гашиш» гиёҳвандлик моддаси ва бир дона электрон тарози борлиги аниқланган.

Тезкор тадбир давом эттирилиб, унинг яшаш хонадони кўздан кечирилганда 1,12 гр «гашиш» ҳамда 42,64 гр «марихуана» гиёҳвандлик моддалари сақланаётганлиги фош қилинган.

Ҳозирда ҳар иккала ҳолат юзасидан божхона текширувлари давом эттирилмоқда.