Ўзбекистон миллий терма жамоаси бош мураббийи Фабио Каннаваро Канадага қарши ўртоқлик учрашувидан кейин ташкил этилган матбуот анжуманида баҳс ҳақида ўз фикрларини билдирди.

Италиялик мутахассиснинг таъкидлашича, биринчи бўлимда жамоа интизомли ва юқори интенсивликда ҳаракат қилган.

«Ҳар қандай ўйинда хатолар бўлади. Бундай хатоларни Жаҳон чемпионатида эмас, айнан шундай ўртоқлик учрашувларида қилган маъқул. Биринчи бўлимда жамоамиз ихчам ва агрессив ўйнади. Иккинчи бўлимда эса тўп назоратини оширишни истадик, аммо интенсивликни йўқотдик ва бунинг учун жазоландик», — деди Каннаваро.

Шунингдек, мураббий юқори суръатда ўйнаш устида иш олиб борилаётганини таъкидлади.

«Мен келганимдан бери жамоада юқори интенсивликни шакллантиришга ҳаракат қиляпмиз. Бу осон эмас, аммо биринчи бўлимда кўплаб ижобий жиҳатларни кўрдим», — дея қўшимча қилди у.

Каннаваро Канада миллий терма жамоаси ҳақида ҳам илиқ фикр билдирди.

«Мен Канадани бир неча йилдан бери кузатаман. Улар сўнгги йилларда жуда катта ўсишга эришди. Бугун ҳам таркибда кўплаб иқтидорли футболчиларни кўрдим», — деди мутахассис.

Мураббий совуқ об-ҳаво футболчилар учун асосий муаммолардан бири бўлганини ҳам қайд этди ва стадионга ташриф буюрган мухлисларга миннатдорлик билдирди.

Жаҳон чемпионати ҳақида гапирган Каннаваро футболчиларга босимсиз ўйнаш кераклигини айтганини маълум қилди.

«Португалия, Колумбия ва Конго жуда кучли жамоалар. Аммо бизда йўқотадиган ҳеч нарса йўқ. Бу мамлакатимиз тарихидаги илк Жаҳон чемпионати. Шунинг учун футболчиларга фақат битта нарса дейман — бу имкониятдан завқланинг», — деди Ўзбекистон терма жамоаси бош мураббийи.

Каннаваро Абдуқодир Ҳусанов ҳақида ҳам алоҳида тўхталиб ўтди.

«Ҳусанов жуда яхши футболчи. Унинг салоҳияти жуда юқори ва ҳали янада ривожланиши мумкин. Баъзан ҳаддан ташқари агрессив ҳаракат қилади, аммо вазиятларни ўқиш борасида янада ўсиши керак. Шунга қарамай, у юқори савиядаги ҳимоячи», — деди мутахассис.