Жорий йилнинг 29 апрель куни Сенатнинг Аграр, сув хўжалиги масалалари ва экология қўмитаси мажлисида Қорақалпоғистон Республикасида ирригация ва мелиорация объектлари ҳолатини яхшилаш бўйича олиб борилаётган ишлар ҳолатини ўрганиш натижалари муҳокама қилинди.

Таъкидланганидек, 2026 йилнинг ўтган даврида ирригация ва мелиорация объектларида қурилиш, реконструкция ва таъмирлаш ишлари учун Давлат бюджетидан 200,1 млрд сўм маблағ ажратилган.

Ушбу маблағлар ҳисобидан 66 км канал ва 40 км коллектор-дренаж тармоқлари қурилган ҳамда реконструкция қилинган, шунингдек, 687 км тармоқларда таъмирлаш ишлари бажарилган.

Амалга оширилган ишлар натижасида 11,8 млн куб метр сув йўқотилишининг олди олинган, 18,5 минг гектар ернинг сув таъминоти ҳамда 7,2 минг гектар ер майдонларининг мелиоратив ҳолати яхшиланган.

Ҳудудда 260,7 минг гектар суғориладиган майдонларда сув тежовчи технологиялар жорий этилган бўлиб, улар жами майдоннинг 51 фоизини ташкил этади. 2026 йил якунига қадар ушбу кўрсаткични 58 фоизга етказиш режалаштирилган.

Сув хўжалиги соҳасини рақамлаштириш ва бошқарув тизимини модернизация қилиш доирасида 995 та «Ақлли сув» ва 1,3 мингта «Дайвер» қурилмаси ўрнатилгани, шунингдек, 7 та йирик сув хўжалиги объектида автоматлаштирилган бошқарув тизими жорий этилгани қайд этилди.

Мажлисда сенаторлар томонидан соҳада айрим муаммолар мавжудлиги ҳам қайд этилди. Жумладан, сув ҳисобини юритишни рақамлаштириш ҳамда олдинги йилларда ер майдонларида жорий этилган сув тежовчи технологиялар ҳолатини хатловдан ўтказиш ишлари якунланмагани, шунингдек, суғориш тармоқларини бетонлаштириш бўйича белгилаган вазифалар ижроси тўлақонли таъминланмагани танқид остига олинди.

Сенаторлар сув асосан тупроқ ўзанли каналларда йўқотилаётгани сабабли ушбу тармоқларни бетонлаштириш орқали йўқотишларини олдини олиш ҳамда сув хўжалиги иншоотларини реал вақт режимида назорат қилиш ва автоматлаштирилган мониторинг тизимига ўтказиш ишларини тўлиқ якунлаш бўйича таклиф ва тавсиялар бердилар.

Мажлисда суғориладиган ерларнинг мелиоратив ҳолатини яхшилаш тадбирларини ўз вақтида амалга ошириш, сувни тежаш ва каналларни бетонлаштириш ишларини молиялаштириш мақсадида хорижий грант ва инвестиция маблағларини жалб қилиш зарурлиги таъкидланди.

Шунингдек, илғор хорижий тажрибаларни инобатга олган ҳолда сув тежовчи технологияларни жорий қилиш ва фойдаланиш бўйича юқори малакали кадрлар тайёрлаш ҳамда соҳадаги мутахассислар малакасини тизимли ошириб бориш чораларини кўриш муҳим эканлиги айтиб ўтилди.

Муҳокама якунида Қўмитанинг тегишли қарори қабул қилинди.