Ўзбекистон Республикаси Марказий банки томонидан Осиё тараққиёт банки (ОТБ) билан ҳамкорликда тижорат банкларининг хотин-қизлар ва эркаклар учун тенг ҳуқуқ ҳамда имкониятларни таъминлаш масалалари бўйича маслаҳат кенгашлари учун семинар ташкил этилди. Семинарда Олий Мажлис Сенатининг Ёшлар, хотин-қизлар, маданият ва спорт масалалари қўмитаси раиси Орзигул Козихонова ва Қўмита аъзоси Малика Кадирханова иштирок этди.

Семинар банк тизимида хотин-қизлар ва эркаклар учун тенг ҳуқуқ ҳамда тенг имкониятларни таъминлашга қаратилган институционал механизмларни янада мустаҳкамлаш, тижорат банкларида фаолият юритаётган маслаҳат кенгашлари иш самарадорлигини ошириш, шунингдек, гендер тенглик тамойилларини изчил жорий этиш мақсадида ташкил этилди.

Тадбирда Марказий банк, тижорат банклари, маслаҳат кенгашлари, тегишли вазирлик ва идоралар, халқаро ташкилотлар ҳамда ривожланиш бўйича ҳамкор ташкилотлар вакиллари иштирок этди.

Семинар давомида банк-молия тизимида гендер тенгликни таъминлашнинг замонавий ёндашувлари, маслаҳат кенгашлари фаолиятининг ташкилий-ҳуқуқий ва услубий асосларини такомиллаштириш, уларнинг институционал бошқарувдаги ролини кучайтириш, шунингдек, гендер сиёсатини амалиётга татбиқ этишнинг самарали механизмларини кенгайтириш масалалари муҳокама қилинди.

Хусусан, иш жойларида тенг имкониятларни таъминлаш, хотин-қизларнинг касбий ва раҳбарлик салоҳиятини ривожлантириш, меҳнат муҳитини янада такомиллаштириш, институционал ҳисобдорликни кучайтириш, шунингдек, гендер кўрсаткичларини мониторинг қилиш ва ҳисобот юритишнинг замонавий ёндашувларини жорий этиш масалаларига алоҳида эътибор қаратилди.

Семинар доирасида миллий ва халқаро тажриба алмашиш, илғор амалиётларни кўриб чиқиш, шунингдек, тижорат банклари фаолиятида гендер тенгликни таъминлаш борасидаги ишларни янада такомиллаштиришга қаратилган амалий тавсиялар ишлаб чиқилди.