Жорий йил 2 июнь куни Президентнинг «Маданият, санъат ва адабиёт соҳаларини янада ривожлантириш бўйича кенг кўламли чора-тадбирлар тўғрисида»ги ПФ–103-сон Фармони қабул қилинди.

Фармонга кўра, қуйидагиларни давлат бюджети ҳисобидан ҳар йили молиялаштириш тизими жорий этилади:

• йилига камида 50 та энг сара асарларни яратиш учун шоир ва ёзувчиларга ижодий буюртма бериш;

• опера, симфония каби мумтоз ва замонавий жанрлар бўйича ҳар йили камида 20 та янги асар яратиш учун ижодкорларга давлат буюртмаси бериш;

• ҳар йили миллий адабиётнинг энг сара 10 та асарини хорижий тилларга таржима қилиш ва муаллифлар иштирокида чет элларда тақдимотлар ўтказиш харажатларини қоплаб бериш;

• Ёзувчилар уюшмаси тавсияси асосида чоп этиладиган китобларни нашр этиш учун қоғоз харид қилиш билан боғлиқ харажатларни қоплаб бериш;

• шеърият билан санъатни уйғунлаштирган ҳолда ташкил этиладиган энг сара 100 та шеърий концертларни ўтказиш бўйича давлат буюртмаси бериш.

2026 йил 1 сентябрдан:

маданият, санъат ва адабиёт соҳаларидаги нуфузли халқаро ва республика танловлари ғолиб ва совриндорлари қуйидаги миқдорларда 1 марталик пул мукофоти билан рағбатлантирилади:

• Гран-при ва 1-ўрин ғолиби – халқаро танлов бўйича 300 млн сўм, республика танлови бўйича 100 млн сўм миқдорида;

• 2-ўрин соҳиби – халқаро танлов бўйича 200 млн сўм, республика танлови бўйича – 50 млн сўм миқдорида;

• 3-ўрин соҳиби – халқаро танлов бўйича 100 млн сўм, республика танлови бўйича 25 млн сўм миқдорида;

• танловларнинг ғолиб ва совриндорларини тайёрлаган ўқитувчи (концертмейстер)нинг ойлик маошига 1 йил давомида 100 фоизгача устама Давлат бюджети ҳисобидан тўланади.