Данғара туманининг «Пишқарон» МФЙ аҳли кейинги йилларда қандолатчиликда ўз брендини яратди. Бугунги кунда ушбу маҳалладаги хонадонларда тайёрланаётган оқ қанд, новвоту турли ширинликлар Фарғона водийси вилоятлари, шу билан бирга, мамлакатимизнинг турли ҳудудларида харидоргир маҳсулотга айланиб улгурган.

Айни пайтда маҳалладаги элликка яқин хонадон қандолатчилик билан шуғулланаётгани мазкур ҳунар ҳудуднинг ривожланиш драйверига айланганидан далолат беради.

Маҳалла раиси Манзурахон Солиеванинг қайд этишича, эътибор ва рағбат туфайли тадбиркорлик муҳити яхшиланиб, оилалар фаровонлиги юксалиб бормоқда. Шу боис маҳаллада ҳар бир оиланинг ўз тадбиркорлиги ва даромад манбаи бор.

Ўтган йилнинг ўзида янги иш бошлаш истагидаги ёшларни тадбиркорликка жалб этиш мақсадида тижорат банки томонидан 60 миллион сўм миқдорида имтиёзли кредит ажратиб берилишига кўмаклашилди. Шунингдек, икки нафар маҳалладошга 14 миллион сўм субсидия ажратилиб, керакли жиҳозлар олиб берилди.

Ёш тадбиркор Акмалжон Йўлчибоев ўз хонадонида оқ қанд ишлаб чиқаришни йўлга қўйган. Ҳозирда уч нафар маҳалладошини доимий иш ўрни билан таъминлаган ҳолда кунига бир тоннадан зиёд шакарни қайта ишлаш ҳамда сифатли оқ қанд ишлаб чиқаришга муваффақ бўлишмоқда.

Қувонарлиси, тиниб-тинчимас ва доимо изланишда бўлган тадбиркор яқин истиқболда фаолиятини янада кенгайтириш ва ўз брендини яратишни мақсад қилган. Ўз навбатида маҳсулот тайёрлашда қадоқлаш жараёнини ҳам қўшиш ҳамда иш ўринларини кўпайтиришни режалаштирмоқда. Шу мақсадда маҳалладаги ҳоким ёрдамчиси билан маслаҳатлашиб, янги бизнес-режа ишлаб чиқди.

Хонадондаги мўъжазгина цехда давом этаётган иш жараёнини кузатиш жуда ҳам мароқли. Махсус тегирмонда унга айланган шакарга босқичма-босқич ишлов берилгач, қолипдан чиққан оқ қанд керакли ҳароратда қуритилади. Шу тариқа мазаси тил ёрар ширинлик тайёр. Бу оқ қанднинг харидорлари бисёрлиги сабабли хонадоннинг ўзидан улгуржи нархда олиб кетишади.

— Пишқаронликлар ҳар жабҳада пешқадам, — дейди маҳалла раиси Манзурахон опа. — Қандолат маҳсулотлари, аёллар ва болалар либослари, оёқ кийимлари, ширин-шакар мевалар, сабзавотлар, хуллас, ҳаммаси ўзимизда муҳайё. Фаол тадбиркорларимиз ҳатто қўшни маҳалла ёшлари, хотин-қизларини ҳам юқори даромадли иш ўринлари билан таъминлагани эътиборга сазовордир.

Шунинг учун маҳалла инфратузилмасини яхшилаш, ободонлаштириш ва кўкаламзорлаштириш ишларида ибратли ташаббуслар кўп. Бу барчамизга чексиз ғурур ва ифтихор бахш этади.

Ботир Мадиёров, «Халқ сўзи».