Ўзбекистон Бош консулхонаси ва Миграция агентлигининг Туркиядаги ваколатхонаси томонидан олиб борилган ишлар натижасида юртдошимиз – 2025 йил декабрь ойидан бери «Acıbadem» хусусий шифохонасида оғир касаллик билан курашаётган 5 ёшли З.С исмли қизалоқ малакали шифокорлар ва яқинлари ҳамроҳлигида ватанга қайтарилди.

Бош консулхона ўзининг телеграм-канали орқали «Uzbekistan Airways» авиакомпаниясининг Туркиядаги ваколатхонаси вакилларига, Туркия ва Ўзбекистон соғлиқни сақлаш вазирликларига, шунингдек, «Acıbadem» хусусий клиникаси мутахассисларига ушбу хайрли ташаббусни амалга оширишда яқиндан ёрдам бергани ва ҳамкорлик қилгани учун чуқур миннатдорлик билдирди.

«Бемор қиз ва унинг яқинларига тезроқ соғайиб кетишини ва мустаҳкам соғлик тилаб қоламиз», дейилади Бош консулхона хабарида.

Шу билан бирга, дипломатлар сўнгги пайтларда Туркияда тиббий хизмат кўрсатиш ниқоби остида содир бўлаётган фирибгарлик ҳолатлари юзасидан ҳушёрликка чақирган. Юртдошларимизга тиббий хизмат билан боғлиқ масалаларда ишончли манбаларга мурожаат қилиш тавсия этилди.