WBA йўналиши бўйича чемпионлик камари учун мажбурий даъвогар ҳисобланган ўзбекистонлик боксчи Бектемир Мелиқўзиевнинг навбатдаги жанг санаси ва рақиби маълум бўлди. Бу ҳақда спортчи ўзининг Instagram саҳифасида маълум қилди.

Унга кўра, «Bek Bully» тахаллусини олган профессионал боксчи 2026 йилнинг 22 февраль куни АҚШнинг Лас-Вегас шаҳрида ташкил этиладиган профессионал бокс оқшомининг асосий кардида рингга чиқади. Ушбу жангда унга Гана вакили Сена Агбеко рақиб бўлади.

Маълумот учун, 29 ёшли Мелиқўзиев профессионал фаолияти давомида 17 та жанг ўтказиб, уларнинг фақат биттасида мағлубиятга учраган. У ғалабаларининг 10 тасини рақибларини муддатидан аввал енгиш орқали қўлга киритган. Боксчимиз сўнгги бор 2025 йилнинг 25 май куни WБА Элиминатор камари учун америкалик Дарюс Фулгҳемга қарши рингга кўтарилиб, ҳакамлар қарори билан ғолиб деб топилган эди.

Унинг 33 ёшли ганалик рақиби Сена Агбеконинг ҳисобида эса 33 та жанг, 29 та ғалаба ва 4 та мағлубият мавжуд. Эътиборли жиҳати шундаки, у ғалабаларининг 23 тасини рақибларини нокаут қилиш орқали қўлга киритган. Шунингдек, мағлуб бўлган жангларидан 3 тасида унинг ўзи муддатидан олдин таслим бўлган, 1 та жангда ҳакамлар қарори билан имкониятни бой берган.

Ўзбекистонлик боксчи кардга чиқадиган турнирнинг марказий жангида ярим ўрта вазн тоифасида WБC чемпиони Марио Барриос ва собиқ жаҳон чемпиони Раян Гарция ўзаро тўқнаш келади. Иккинчи асосий баҳсда эса Ричардсон Хитчинс ўз камарини Оскар Дуартедан ҳимоя қилади.