Безорилик билан шуғулланган бир гуруҳ шахслар қўлга олиниб, уларга нисбатан жиноят иши қўзғатилди. Бу ҳақида «Хавфсизлик» Telegram-канали хабар берди.

Маълум қилинишича, уюшган жиноятчиликка қарши курашиш йўналишида ДХХ ва ИИВ органлари томонидан тезкор-қидирув тадбирлари ўтказилган.

Мазкур тадбирлар давомида Тошкент вилоятининг Чирчиқ шаҳрида ўзларини қонундан устун қўйиб, кўча ечими ва безорилик билан шуғулланган бир гуруҳ шахслар қўлга олиниб, уларга нисбатан жиноят иши қўзғатилган.

Хусусан:

Саидов Икром Эркинович, 1988 йилда Бухоро вилоятида туғилган, муқаддам Жиноят Кодексининг 277-моддаси билан судланган;
Саидов Ислом Эркинович, 1990 йилда Бухоро вилоятида туғилган, муқаддам Жиноят Кодексининг 267-моддаси билан судланган;
Баизбаев Умиджон Зафар ўғли, 1998 йилда Тошкент вилоятида туғилган;
Рустамов Аъзамжон Мансурович, 2001 йилда Бухоро вилоятида туғилган;
Супонов Қурбонали Носирович, 2002 йилда Навоий вилоятида туғилган;
Фармонов Мирзохид Шухратович, 1988 йилда Қашқадарё вилоятида туғилган.

Маълумот берилишича, ушбу шахслар умумеътироф этилган хулқ-атвор нормалари ва жамиятда ўрнатилган юриш-туриш қоидаларини менсимасдан, ошкора равишда жамоат тартибини бузиб, безориликлар содир этган. Шунингдек, фуқароларга руҳий ва жисмоний босим ўтказиш орқали пул топиш билан шуғулланиб келган.

«Ҳурматли фуқаролар! Агарда сиз ушбу шахсларнинг ноқонуний ҳаракатларидан жабр кўрган бўлсангиз ДХХнинг 1520 ёки ИИВнинг 102 қисқа рақамларига қўнғироқ қилишингиз мумкин», — дейилади ДХХ хабарида.