АҚШ ва Эрон ўртасидаги музокаралар, катта эҳтимол билан, душанба куни (20 апрель) Покистонда бўлиб ўтади. Бу ҳақда The Wall Street Journal (WSJ) нашри Америка етакчиси маъмуриятининг юқори мартабали вакилига таяниб хабар бермоқда.

Нашрнинг таъкидлашича, музокаралар ҳали расман белгилангани йўқ. Суҳбатдошнинг қайд этишича, АҚШ Президенти Дональд Трампнинг жамоаси ҳозирда кутиш режимида ва музокараларда қатнашишга шай турибди.

WSJ ўтган дам олиш кунлари бир неча раунд музокаралар ўтказилганини, бироқ улар можарога чек қўя оладиган даражадаги муҳим натижага олиб келмаганини эслатиб ўтди.

Аввалроқ The Express Tribune нашри Покистон ҳукумати АҚШ ва Эрон ўртасидаги янги музокаралар босқичини ўтказишга тайёргарлик кўришни бошлагани ҳақида хабар берган эди.

Мавжуд маълумотларга кўра, Исломободдаги Serena меҳмонхонаси яна хорижий делегацияларни қабул қилишга тайёрланмоқда.