Олий Мажлиси Сенатининг Бюджет ва иқтисодий масалалар қўмитаси раиси Эркин Гадоев бошчилигидаги ишчи гуруҳ Наманган вилоятида бўлиб, ҳудудда амалга оширилаётган ижтимоий-иқтисодий ислоҳотлар, саноат салоҳиятини ошириш ҳамда аҳоли бандлигини таъминлаш борасидаги ишларни ўрганди.

Ишчи гуруҳ ҳудуддаги ишлаб чиқариш корхоналари фаолияти билан яқиндан танишиб, хусусан, тикувчилик саноатида амалга оширилаётган лойиҳаларнинг ҳолати, уларнинг иқтисодий самарадорлиги ва аҳоли бандлигини таъминлашдаги ўрнини атрофлича ўрганди.

Жумладан, «Ифтихор кийим саноат» МЧЖ ҳамда «Фазман» тикувчилик корхонаси фаолияти билан танишилди. Ушбу корхоналарда ишлаб чиқариш жараёнлари, замонавий технологиялар ва инновацион ечимларни жорий этиш ҳолати, шунингдек, меҳнат муҳофазаси ва ходимлар учун яратилган шарт-шароитлар кўздан кечирилди.

Қайд этилганидек, мазкур корхоналарда турли хил тайёр кийим-кечак маҳсулотлари ишлаб чиқарилиб, ички бозорни сифатли маҳсулотлар билан таъминлаш билан бир қаторда, экспорт ҳажмини оширишга ҳам хизмат қилмоқда. Энг муҳими, бу ерларда юзлаб иш ўринлари яратилган бўлиб, аҳоли, айниқса ёшлар ва хотин-қизларнинг бандлигини таъминлашда муҳим аҳамият касб этмоқда.

Учрашув чоғида ишлаб чиқариш қувватларини кенгайтириш, маҳсулотлар рақобатбардошлигини ошириш, халқаро стандартларга мувофиқликни таъминлаш ҳамда экспорт географиясини кенгайтириш масалалари муҳокама қилинди. Шунингдек, соҳадаги мавжуд муаммоларни бартараф этиш ва тадбиркорлик субъектларини қўллаб-қувватлаш бўйича тегишли таклиф ва тавсиялар ишлаб чиқилди.

Ташриф якунида сенатор томонидан ҳудудда амалга оширилаётган ислоҳотларнинг изчиллигини таъминлаш, инвестициявий жозибадорликни ошириш ҳамда янги иш ўринларини яратишга қаратилган чора-тадбирларни янада кучайтириш юзасидан масъул ташкилотларга тегишли кўрсатмалар берилди.