Кеча, 30 май куни «Пушкаш Арена» стадионида бўлиб ўтган УЭФА Чемпионлар Лигаси финали футбол мухлисларига унутилмас оқшомни тақдим этди. Бош соврин учун ПСЖ ва Арсенал жамоалари майдонга тушди. 120 дақиқага чўзилган кескин баҳс пенальтилар сериясигача давом этди ва якунда ПСЖ ғалабани қўлга киритди.

Учрашув Арсенал учун идеал тарзда бошланди. Ҳали жамоалар ўйин ритмига мослашиб улгурмасидан, 6-дақиқада Леандро Троссарднинг аниқ узатмасидан сўнг Кай Хавертц ҳисобни очди. Эрта гол лондонликларга устунлик берган бўлсада, улар кейинги дақиқаларда кўпроқ ҳимоявий ўйин намойиш этди.

ПСЖ эса ташаббусни ўз қўлига олди ва тўп назоратида сезиларли устунликка эришди. Парижликларнинг босими 65-дақиқада натижа берди. Жарима майдончаси ичидаги қоида бузилишидан кейин белгиланган пенальтини Усмон Дембеле аниқ амалга ошириб, ҳисобни тенглаштирди.

Қолган вақт давомида ҳар икки жамоада имкониятлар бўлди. Бироқ асосий ва қўшимча бўлимларда ҳисоб ўзгармади. Ғолиб номи пенальтилар сериясида аниқланди.

ПСЖ сафида Гонсало Рамош, Дезере Дое, Ашраф Ҳакими ва Лукас Бералдолар ўз зарбаларини муваффақиятли амалга оширди. Арсенал таркибида эса Виктор Гёкереш, Деклан Райс ва Габриэл Мартинеллелар аниқ ҳаракат қилди.

Ҳал қилувчи паллаларда Арсенал футболчиси Эберечи Эзе ўз имкониятидан фойдалана олмади. Кейинчалик Давид Рая ПСЖ футболчиси Нуну Мендешнинг зарбасини қайтариб, жамоасига умид бағишлади. Аммо сўнгги ҳал қилувчи зарбада Габриэл Магаляес хатога йўл қўйди ва кубок ПСЖга насиб этди.

Микел Артета учрашув давомида Юрриэн Тимбер, Эберечи Эзе, Габриэл Мартинелли, Вектор Гёкереш ва Нони Мадуекеларни майдонга тушириб, ўйин темпига таъсир кўрсатишга уринди. Луис Энрике эса Бредли Барколя, Гонсалу Рамуш ҳамда Уоррен Заир-Эмерини ўйинга қўшиб, жамоасининг ҳужумкорлигини сақлаб қолд. Учрашув давомидаги статистик рақамлар ҳам парижликлар фойдасига ишлади. ПСЖ тўп назоратида устунлик қилди ва ўйин давомида кўпроқ аниқ паслар амалга оширди.

Арсенал финалда муносиб кураш олиб борди ва узоқ вақт давомида устунликни сақлаб турди. Бироқ ПСЖ босим остида ҳам ўз ўйинидан воз кечмади. Пенальтилар сериясидаги совуққонлик ва тажриба парижликларга навбатдаги йирик совринни тақдим этди.