Фарғона вилояти Қўқон шаҳрида контрабанда йўли билан олиб келинган гиёҳвандлик воситалари мусодара қилинди. Бу ҳақда Давлат хавфсизлик хизмати хабар берди.

Қайд этилишича, Қўқон шаҳрида ҳаракатланаётган Фарғона туманида яшовчи, 1995 йилда туғилган фуқаро бошқарувидаги «Damas» русумли автотранспорт воситаси тўхтатилиб, холислар иштирокида кўздан кечирилган. Натижада унинг салонида 2 кг 40 гр «гашиш» моддаси ва 5600 дона «Регапен» кучли таъсир қилувчи дори воситаси борлиги аниқланган.

Терговга қадар текширув жараёнида маълум бўлишича, мазкур шахс Қирғиз Республикасидаги жиноий шеригидан олган гиёҳвандлик воситаларини Қўқон шаҳрида сотишни режалаштирган.

Ҳозирда унга нисбатан ДХХ Фарғона вилояти бўйича бошқармаси томонидан Жиноят кодексининг 246, 251-1 ва 273-моддалари билан жиноят иши қўзғатилиб, «қамоқ» эҳтиёт чораси қўлланилган.