Бугун, 1 май куни бортида АҚШнинг миграция қонунчилигини бузгани учун депортация қилинган 26 нафар Ўзбекистон фуқароси чартер рейс Тошкент халқаро аэропортига келиб қўнди. Бу ҳақда «Дунё» ахборот агентлиги хабар берди.

Маълум қилинишича, мазкур рейс Ўзбекистон ва АҚШнинг тегишли идоралари мувофиқлаштирилган саъй-ҳаракатлари натижасида амалга оширилган. Икки томонлама ҳамкорлик доирасида фуқароларнинг шахсини аниқлаш, тегишли ҳужжатларни расмийлаштириш ва уларнинг хавфсиз олиб келинишини таъминлаш каби барча зарур ташкилий ва ҳуқуқий тартиб-таомиллар тезкорлик билан келишиб олинган.

Таъкидланишича, Ўзбекистон миграция соҳасида хорижий шериклар билан ҳамкорликни доимий равишда ривожлантириб, миграция қонунчилиги бузилишининг олдини олишга, шунингдек, чет элдаги ўз фуқароларининг ҳуқуқ ва қонуний манфаатларини ҳимоя қилишни таъминлашга алоҳида эътибор қаратмоқда.