Қўқон ва Бекобод шаҳарларида алкоголь ва тамаки маҳсулотларининг ноқонуний савдоси фош этилди. Бу ҳақида Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Қўқон шаҳри бўлими ходимлари томонидан тезкор тадбир ўтказилган.

Унда ЯТТ «Т.Д.» «Алишер Навоий» кўчасидаги савдо дўконида умумий баҳоси 288,2 млн сўмлик 140 турдаги 14 311 қути акциз маркасиз ва 26 турдаги 240 қути чет элда ишлаб чиқарилган электрон тамаки маҳсулотларини савдога қўйганлиги аниқланиб, ушбу маҳсулотлар ашёвий далил сифатида расмийлаштириб олинган.

Шу каби яна бир ҳолат, Департаментнинг Бекобод шаҳри бўлими ходимлари томонидан ўтказилган тезкор тадбирда ҳам аниқланган.

Унга кўра, «А.« МЧЖ раҳбари К.Ш. «Ўзбекистон» МФЙ ҳудудидаги савдо дўконида 619 дона қалбаки акциз маркали алкоголь ва тегишли ҳужжатлари бўлмаган 30 турдаги 1 208 қути тамаки маҳсулотларини савдога қўйганлиги аниқланиб, ушбу маҳсулотлар ашёвий далил сифатида расмийлаштирилган.

Ҳозирда мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 25, 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят ишлари қўзғатилиб, тергов ҳаракатлари ўтказилмоқда.