Жорий йилнинг 27–28 апрель кунлари Сенатнинг Аграр, сув хўжалиги масалалари ва экология қўмитаси раиси ўринбосари Сайёра Абдикаримова бошчилигидаги ишчи гуруҳ томонидан Қорақалпоғистон Республикасининг қатор туманларида ирригация ва мелиорация объектлари ҳолатини яхшилаш бўйича амалга оширилаётган ишлар ўрганилди.

Дастлаб масъуллар иштирокида йиғилиш ўтказилиб, сув хўжалиги соҳасида қабул қилинган Президент фармон ва қарорлари ижроси доирасида амалга оширилаётган ишлар муҳокама қилинди.

Ўрганиш давомида ишчи гуруҳ Нукус шаҳридаги «Теле орай» МФЙда аҳоли томорқаларининг сув таъминотини яхшилашга қаратилган ишлар билан танишди, маҳалла фаоллари билан мулоқот ўтказилди. Шунингдек, Тахиатош туманидаги «Эски Кенегес» каналида олиб борилаётган реконструкция ишлари кўздан кечирилди. Канални бетонлаштириш орқали сув ресурсларидан самарали фойдаланиш, сув ҳамда электр энергияси тежалишига эришиш мақсад қилинган.

Бундан ташқари, Хўжайли туманидаги 680 гектар майдонга хизмат кўрсатувчи «Ойбек» насос станцияси фаолияти ҳам кўздан кечирилди. Ҳозирда объектда насос агрегатларини энергия тежамкор турларга алмаштириш орқали электр энергияси тежалишига эришиш мумкинлиги қайд этилди.

Ўрганиш якунида ҳудудлардаги мелиорация объектлари, жумладан фермер хўжаликлари ерларидаги коллектор-дренаж тармоқлари ҳолати таҳлил қилиниб, мавжуд муаммоларни бартараф этиш, коллекторларни тозалаш ва таъмирлаш ҳамда сув чиқариш тизимлари самарадорлигини ошириш бўйича тегишли тавсия ва таклифлар берилди.