Фарғона шаҳрида жойлашган Аҳмад Фарғоний номидаги истироҳат боғида Миллий гвардия Фарғона вилояти бўйича бошқармасида муддатли ҳарбий хизматни ўташ учун келган ёш аскарлар иштирокида «Ватанга қасамёд» тадбири бўлиб ўтди.

Тантанали тадбирда давлат ва жамоат ташкилотлари вакиллари, нуронийлар, ёшлар, ҳарбий хизматчиларнинг ота-оналари ҳамда яқинлари қатнашди.

Таъкидлаб ўтилганидек, юрт ҳимояси шарафли, шу билан бирга масъулиятли вазифа. Шунинг учун ҳам бундай шарафли бурчни зиммасига олаётган ҳар бир фарзанд қалбида мардлик, жасорат туйғулари мужассам бўлиши керак.

Нигоҳлари теран, қадамлари ўктам бўлган ёш аскарлар Ватан ҳимоясига доимо шай эканлигини намойиш этган ҳолда «Ватанга садоқат» қасамёдини қабул қилдилар.

— Бугун жуда ҳам бахтиёрман, — дейди муддатли ҳарбий хизматчи, оддий аскар Шерзод Абдуҳалимовнинг онаси Муҳайё Азимова. — Ўғлим болаликдан мактабда аъло баҳоларга ўқиб, спорт машғулотларида маънан ва жисмонан баркамол бўлиб улғайди. У келажакда ҳарбий бўлишни мақсад қилган. Орзуси ижобати йўлида яна бир дадил қадам ташлаганидан жуда ҳам мамнунман.

Шу маънода, ушбу қасамёд шунчаки ҳарбий анъана эмас, элу юрт олдидаги муқаддас бурчни англаш, бир умр унга содиқ қолишни намоён этувчи тадбирдир.

Таъкидлаш ўринлики, шу куни ҳарбийлар иштирокида жанговар ва жисмоний тайёргарлик бўйича ташкил этилган кўргазмали чиқишлар иштирокчиларда унутилмас таассурот қолдирди. Юзма-юз ва самимий суҳбатларда эса халқ ва армия ҳамиша якдил эканлиги таъкидланди.

Ботир Мадиёров, «Халқ сўзи».