Россия қуролли кучлари Украина ҳудуди бўйлаб сўнгги ойлардаги энг йирик ракета ва дрон ҳужумларидан бирини амалга оширди. Бу ҳақида BBC нашри хабар берди.

Маълум қилинишича, тунги зарбалар оқибатида камида 14 киши ҳалок бўлган. Ўнлаб инсонлар, жумладан, болалар турли даражадаги тан-жароҳатлари олган.

Украина президенти Владимир Зеленскийнинг маълум қилишича, ҳужум давомида жами 656 та ҳарбий дрон ва 73 та турли ракеталардан фойдаланилган. Асосий зарбалар Киев ва Днепр шаҳарларидаги турар жой бинолари ҳамда фуқаролик инфратузилмасига тўғри келган.

Сўнгги маълумотларга кўра, Днепрда кўп қаватли уйнинг вайрон бўлиши оқибатида 9 киши, пойтахт Киевда эса 5 киши ҳалок бўлган. Шунингдек, Харьков ва Запорожье вилоятларида ҳам энергия объектлари ҳамда саноат корхоналари нишонга олинган.

Россия мудофаа вазирлиги ушбу зарбаларни Украинанинг аввалги ҳаракатларига жавоб эканини таъкидлаб, ҳужум мақсадларига эришилганини маълум қилди. Москва ўтган ҳафтада босиб олинган шарқий ҳудудлардаги объектларга қилинган ҳужумдан сўнг «тизимли зарбалар» бериши ҳақида огоҳлантирган эди.

Мазкур вазият фонида Зеленский ҳаво мудофаасини кучайтириш учун АҚШдан «матриот» тизимлари учун ракеталар етказиб беришни тезлаштиришни сўради. АҚШда ҳокимият алмашгач, Украинага тўғридан-тўғри ҳарбий таъминот тўхтатилгани сабабли, Киевнинг Европадаги иттифоқчилари ушбу қуролларни АҚШдан сотиб олиб, Украинага етказиб беришга мажбур бўлмоқда.

Украина ҳукумати Россиянинг ушбу ҳаракатларини кескин қоралаб, халқаро ҳамжамиятни Москвага нисбатан босимни кучайтиришга чақирган.