Жанубий Корея апелляция суди акциялар нархини манипуляция қилиш ва пора олиш иши бўйича собиқ биринчи хоним Ким Гон Хи учун белгиланган қамоқ муддатини қайта кўриб чиқди, деб ёзади «Коммерсантъ».

Жорий йилнинг январь ойида у 20 ойлик қамоқ жазосига ҳукм қилинган эди. Эндиликда бу муддат тўрт йилгача оширилди, шунингдек, унга 50 миллион вон (тахминан 34 минг доллар) миқдорида жарима белгиланди.

Тергов маълумотларига кўра, Ким Гон Хи автомобиль дилери қимматли қоғозлари қийматини манипуляция қилиш орқали 810 миллион вон (564 минг доллар) фойда кўрган. Бундан ташқари, у сиёсий кампанияларни молиялаштириш қоидаларига риоя қилмаганликда айбланган.

Эслатиб ўтамиз, жорий йилнинг февраль ойида Жанубий Кореянинг собиқ президенти Юн Сок Ёль 2024 йил декабридаги исён иши бўйича умрбод қамоқ жазосига ҳукм қилинган эди.

Тегишли ҳукмни Сеул марказий туман суди чиқарган.