Олий Мажлис Сенатининг Аграр, сув хўжалиги масалалари ва экология қўмитаси аъзоси Икромхон Нажмиддинов ташаббуси билан Наманган вилоятининг бир гуруҳ фаол нуронийлари учун Қозоғистон Республикасининг Туркистон шаҳрига зиёрат ва маърифий сафар ташкил этилди.

Нуронийлар дастлаб Туркистон шаҳрида Ўзбекистон Республикаси Президенти Шавкат Мирзиёев ташаббуси билан бунёд этилган янги масжид мажмуасини зиёрат қилдилар. Муҳташам меъморий ечимлари, нафис безаклари ҳамда обод ва файзли муҳити билан ажралиб турувчи ушбу мажмуа нуронийларда катта таассурот қолдирди.

Сафарнинг навбатдаги манзили туркий халқлар ва ислом оламининг буюк мутафаккири, аллома Хўжа Аҳмад Яссавий мақбараси бўлди. Иштирокчилар ушбу муқаддас қадамжода бўлиб, алломанинг бой маънавий мероси, ҳаёти ва фаолияти билан яқиндан танишдилар.

Таъкидланганидек, мазкур сафар иштирокчиларнинг маънавий дунёқарашини бойитиш, тарихий меросга бўлган ҳурматни мустаҳкамлаш ҳамда халқлар ўртасидаги дўстлик ва ҳамжиҳатлик ришталарини янада кучайтиришга хизмат қилди.