Сенатнинг Фан, таълим ва соғлиқни сақлаш масалалари қўмитаси аъзоси Гулнора Маруфова халқ депутатлари Фарғона вилоят Кенгаши депутатлари билан биргаликда Ўзбекистон туманидаги «Янги Ҳаёт» маҳалла фуқаролар йиғини ҳудудида тадбиркорлик билан шуғулланаётган М. Ғофурованинг фаолиятини ўрганди.

Ҳунармандчилик ва касаначилик йўналишларида амалга оширилаётган ишлар, яратилган ишлаб чиқариш қувватлари ҳамда аҳоли бандлигини таъминлаш борасидаги фаолият билан яқиндан танишилди.

Таъкидланганидек, тадбиркор томонидан гиламчилик ҳамда кўрпа-тўшак маҳсулотлари ишлаб чиқариш йўлга қўйилган. Маҳсулотлар нафақат ички бозорда, балки хорижий мамлакатларда ҳам харидоргир бўлиб, бугунги кунда Туркия ва Қирғизистонга экспорт қилинмоқда.

Мазкур фаолият натижасида 100 нафардан ортиқ ҳунарманд ва касаначининг доимий бандлиги таъминланган. Бу эса ҳудудда янги иш ўринлари яратиш, хотин-қизларнинг иқтисодий фаоллигини ошириш ҳамда оилалар даромадларини кўпайтиришга хизмат қилмоқда.

Мулоқот давомида тадбиркорликни янада ривожлантириш, экспорт ҳажмини кенгайтириш ва хотин-қизлар бандлигини қўллаб-қувватлаш масалалари юзасидан фикр алмашилди.

Ўрганишлар якунида сенатор томонидан амалга оширилаётган ишлар ижобий баҳоланиб, фаолият самарадорлигини оширишга қаратилган тегишли тавсиялар берилди.