Warner Bros. студияси дунёга машҳур «Тахтлар ўйини» сериали асосида тўлиқ метражли фильм устида иш бошлади. Лойиҳа йирик блокбастер сифатида режалаштирилган бўлиб, ўзининг миқёси жиҳатидан Денни Вилнёвнинг «Дюна» асари билан беллашиши кутилмоқда.

The Hollywood Reporter нашрининг хабар беришича, фильм сценарийсини «Андор» ва «Карталар уйи» каби ҳит лойиҳалар муаллифи Бо Уиллимон ёзмоқда.

Фильм воқеалари сериалдаги воқеалардан қарийб 300 йил аввалги даврни қамраб олади. Диққат марказида Етти қиролликни бирлаштирган ва Қироллик қўналғасига асос солган афсонавий Эйгон I Таргариен образи бўлади. Қизиғи шундаки, HBO айни шу тарихий давр асосида алоҳида сериал устида ҳам иш олиб бормоқда.

«Тахтлар ўйини»ни катта экранга олиб чиқиш ғояси янгилик эмас. Ҳали 2013 йилда лойиҳа раҳбарлари сериални «Узуклар ҳукмдори» услубидаги трилогия билан якунлашни таклиф этишган, бироқ у пайтда HBO сериал форматига содиқ қолишни афзал кўрган эди.

Ҳозирча суратга олиш ишлари ва премьера санаси очиқланмаган. Бироқ Warner Bros. атрофидаги бизнес ўзгаришларга қарамай, раҳбарият ушбу франчизани ривожлантиришга катта қизиқиш билдирмоқда. Миш-мишларга кўра, келажакда Аря Старк ва Жон Сноу (лойиҳа аввалроқ тўхтатилганига қарамай) ҳақидаги ҳикоялар ҳам қайта кўриб чиқилиши мумкин. Шунингдек, «Денгиз илони» — Корлис Веларион ҳақидаги анимацион сериал устида ҳам иш кетмоқда.