Кеча, 29 апрель куни футбол бўйича Европа чемпионлар лигаси мусобақасининг ярим финал ўйинлари давом эттирилди. Кун доирасида ўрин олган баҳсда Лондоннинг “Арсенал” жамоаси Мадридда “Атлетико” клуби меҳмони бўлди.

Ушбу жамоалар мавсумни жуда яхши ўтказмоқдалар. “Арсенал” клуби айни вақтда АПЛда етакчи бўлиб турган бўлса, “Атлетико” ўтган мавсум давомида гранд клубларни мағлуб этиш орқали катта обрўга эга бўлди. Диего Симеоне бошқарувидаги клуб бевосита чорак финалда “Барселона”ни мағлубиятга учратишни уддалади.

Жамоалар ярим финалнинг дастлабки ўйинини қуйидаги таркиб билан бошладилар:

“Атлетико” – Облак, Льоренте, Ҳанско, Пубил, Ружжери, Симеоне, Кардосо, Коке, Лукман, Алварес, Гризманн.

“Арсенал” – Райя, Салиба, Уайт, Габриэл, Инапкие, Субименди, Райс, Эдегор, Мадуэке, Мартинелли, Гёкереш.

“Атлетико Мадрид” жамоаси ҳимоясида ўйин олдидан жиддий муаммолар бор эди. Жамоа етакчилари Хосе Мария Хименес ва Николас Гонсалес жароҳати туфайли қайдномадан ўрин олишмади. “Арсенал”да ҳам йўқотишлар мавжуд бўлиб, Микель Мерино, Кай Ҳаверц ва Юрриен Тимбер жароҳати туфайли ўйинни ўтказиб юборишди.

Учрашувнинг биринчи бўлими “Арсенал” жамоасининг устунлиги остида ўтди. Лондонликлар рақиблари дарвозасини 6 марта “ўққа тутишди“. Аммо, баъзан зарбалар ноаниқ чиққан бўлса, баъзан Ян Облак жамоасини қутқарди.

Учрашувда ҳисоб 44 дақиқада очилди. “Атлетико” ҳимоячиси Ҳанско ўз жарима майдончаси ичида Виктор Гёкерешни қўполлик билан тўхтатиб қолди. Учрашув ҳаками ҳеч иккиланмасдан мезбонлар дарвозаси томон пенальти белгилади. 11 метрлик жарима тўпидан жабрланувчининг ўзи унумли фойдаланиб ҳисобни очди. Биринчи бўлим меҳмонларнинг 0:1 ҳисобидаги ғалабаси билан якунланди.

Иккинчи бўлимнинг 56 дақиқасига келиб ҳисоб тенглашди. Бу сафар энди Микель Артета жамоаси дарвозаси томон пенальти белгиланди. Боиси Маркос Льоренте томонидан йўлланган зарбани меҳмонлар ҳимоячиси Бен Уайт қўли билан ўйнаган эди. Мезбонлардан пенальтини Хулиан Алварес аниқ амалга ошириб ҳисобни тенглаштирди.

Буюғига ҳар икки жамоа ғалабани илиб кетиш учун қатор уринишларни амалга оширди. “Атлетико Мадрид” устози Диего Симеоне захирадан Робин Ле Норман, Алекс Баэна ва Науэль Молина каби футболчиларни майдонга туширди. Микель Артета эса Эберечи Эзе, Бакайо Сака, Леандро Троссар, Габриэл Жезус ва Кристиан Москера ўйинга қўшди. Аммо баҳсда бошқа ҳисоб ўзгармади.

“Sofascore” портали ўйиндан сўнг, пенальтиларга сабаб бўлиб қолган футболчилар Давид Ҳанско ва Бен Уайтнинг ўйини энг паст баҳога лойиқ топди. Ҳар икки футболчининг ўйини портал томонидан 6 баллга лойиқ топилди. Энг юқори баҳо эса “Арсенал” ҳужумчиси Виктор Гёкерешга берилди. Швейцариялик футболчининг ҳаракатлари портал томонидан 7,7 баллга лойиқ топилди.

Шу тариқа 68 421 мухлис кўз ўнгида “Riyad Air Metropolitano”да кечган баҳс 1:1 ҳисобида якунланди. Демак, финал масаласи тўлиқлигича 6 май куни Лондонда ҳал бўлади.