Юртимизда маданият, санъат, адабиёт ва оммавий ахборот воситалари соҳаларида меҳнат қилаётган инсонларни қўллаб-қувватлаш, уларнинг ижод қилиши учун қулай имкониятлар яратиш давлатимиз сиёсатининг муҳим йўналишларидан бирига айланди. Бу эътиборнинг самараси ўлароқ ижодкорлар халқимиз маънавиятини юксалтиришга хизмат қиладиган асарлар яратиш имкониятига эга бўлмоқда.

“Нуроний” газетасининг Андижон вилояти бўйича мухбири сифатида фаолият юритар эканман, мамлакатимизда кексаларга кўрсатилаётган ғамхўрлик ва эҳтиромнинг бевосита гувоҳи бўлиб, бу ўзгаришлар ҳақида туркум мақолалар эълон қиляпман.

Нуронийлар миллатнинг маънавий таянчи. Уларнинг маслаҳати, дуоси ва ибратли ҳаёт йўли жамиятимиз тараққиёти учун беқиёс маънавий қийматга эга. Айниқса, бугунги глобаллашув жараёнлари авж олаётган паллада ёшлар билан ишлаш масаласи долзарб аҳамият касб этмоқда. Шу жиҳатдан йигит-қизларнинг ижодий изланишларини қўллаб-қувватлаш, журналистиканинг масъулияти ва шарафини уларга англатишга доимо ҳаракат қилиб келмоқдаман. Чунки, бугунги ёш журналистлар эртанги миллий матбуотимиз қиёфасини белгилайди.

“Дўстлик” ордени билан тақдирланганим бу жамоамизга, устозларим ва ҳамкасбларим меҳнатига берилган юксак баҳо деб ҳисоблайман. Бу мукофот менга янги куч ва ғайрат бағишлайди, халқимиз ишончини оқлаш йўлида янада фаол ижод қилишга ундайди.

Замира РЎЗИЕВА,

“Дўстлик” ордени соҳиби.