Жорий йилнинг 7 апрель куни Президентимиз раислигида ўтказилган видеоселектор йиғилишида белгиланган устувор вазифалар ижросини таъминлаш мақсадида Сурхондарё вилоятида Олий таълим, фан ва инновациялар вазирлиги ҳамда Спорт вазирлиги ҳамкорлигида ташкил этилган ўқув-амалий семинар ва спорт ҳафталигига старт берилди.

Дастлаб, Термиз шаҳрида Олий таълим, фан ва инновациялар вазири бошчилигида республика олий таълим муассасалари ректорлари иштирокида “Соғлом ҳаёт учун ўн минг қадам” шиори остида оммавий юриш марофони ўтказилди.

Спорт ҳафталиги доирасидаги ушбу тадбир аҳоли, айниқса, ёшлар ўртасида фаол ҳаёт тарзини кенг тарғиб қилиш ҳамда жисмоний фаолликни оширишга қаратилгани билан аҳамиятлидир.

Марофонда вазирлик ва олий таълим муассасалари раҳбарлари иштирок этиб, шахсий намуна кўрсатдилар. Уларнинг оммавий юриши соғлом ҳаёт маданиятини ҳаётга татбиқ этиш, таълим тизимида соғлом муҳитни мустаҳкамлаш ҳамда жамоавий ҳамжиҳатликни кучайтиришга хизмат қилади.

— Бундай ташаббуслар ёшлар ўртасида соғлом турмуш маданиятини шакллантириш, уларни спортга кенг жалб этишда муҳим аҳамият касб этади, — дейди Термиз давлат муҳандислик ва агротехнологиялар университети ректори Расул Тўраев. — Айниқса, раҳбарларнинг талабалар билан бир сафда иштирок этиши ёшлар учун кучли мотивация бўлиб хизмат қилади. Бу эса таълим тизимида ўзаро яқинлик ва ҳамкорлик муҳитини янада мустаҳкамлайди.

Шунингдек, спорт ҳафталиги доирасида талаба-қизлар ўртасида футбол бўйича “Вазир кубоги” мусобақасига ҳам старт берилди. Унда мамлакатнинг барча ҳудудларидан келган 12 та жамоа ғолиблик учун беллашмоқда. Мусобақа ёш қизларни спортга кенг жалб этиш, уларнинг жисмоний тайёргарлигини ошириш ҳамда соғлом рақобат муҳитини шакллантиришга хизмат қилади.

Ўқув-амалий семинарда Олий таълим, фан ва инновациялар вазири Қўнғиротбой Шарипов, Спорт вазири Адҳам Икрамов ҳамда Сурхондарё вилояти ҳокими Улуғбек Қосимов иштирок этишди.

Мазкур ўқув-амалий семинар ва спорт тадбирлари 24 апрель кунига қадар давом этади.

Фарҳод ЭСОНОВ, “Халқ сўзи”.